ტეგების არქივი: ჩრდილოეთ კორეა

ჩრდილოეთ კორეის საპატიმროებს გადარჩენილ ქრისტიანთა ისტორიები

ჩრდილოეთ კორეის საპატიმროებს გადარჩენილი ქრისტიანები აღწერენ, როგორ გადაიტანეს მტანჯველი წამება, როგორიცაა ვიწრო და პატარა საკნებში გამომწყვდევა, სადაც შეუძლებელია დაწოლა ან ფეხზე დგომა. ისინი მოწმობენ, რომ ციხის მცველები ქრისტიანს ბავშვის მოკვლასაც კი აიძულებდნენ.

ქრისტიანი ქალი, სახელად ჰიე ვუ (მისი ნამდვილი სახელი არ არის) ორგანიზაცია Open Doors USA-თან საუბრისას ამბობს, რომ მისი ქალიშვილი შიმშილისგან მოკვდა, 1997 წელს, ჩრდილოეთ კორეაში დიდი შიმშილობის დროს. მოგვიანებით მისი მეუღლე ჩინეთში გაიქცა, სადაც ის ქრისტიანი გახდა, მაგრამ დაიჭირეს და ჩრდილოეთ კორეის საპატიმროში გაგზავნეს, სადაც ის დაიღუპა კიდეც.

ქმრის მსგავსად, ჰიე ვუც გაიქცა ჩინეთში, მაგრამ ისიც დაიჭირეს და ჩრდილოეთ კორეაში დააბრუნეს, სადაც ციხეში აღმოჩნდა. ორგანიზაცია Open Doors USA-თან საუბრისას ის ციხეში გატარებულ დღეებს იხსენებს:

„საპატიმრო სხვადასხვა ნაწილად იყო დაყოფილი, ზოგიერთი სექტორი სამეურნეო საქმიანობისთვის იყო, ზოგიერთი – სამშენებლო, ზოგიც კი – მაღაროებში მუშაობისთვის. ქალები და კაცები ცალ-ცალკე იყვნენ, ყველა პატიმარი ისე გამოიყურებოდა, თითქოს სადაცაა სისუსტისგან გული წაუვიდოდათ, ყველა მათგანი უიმედო და სასოწარკვეთილი იყო და ამასთან ერთად მშიერიც.

თითოეული იღებდა ერთ მუჭა სიმინდს და რაღაც წვენს. მთელი წლის განმავლობაში ასე ვიკვებებოდით. პატიმრებს იმდენად შიოდათ, რომ მზად იყვნენ ყველაფრისთვის, ზოგიერთი მათგანი ძროხის განავალს ეძებდა, აგროვებდა და ჭამდა.

პატიმრები არა მხოლოდ მუშაობდნენ, არამედ ექსტრემალურ პირობებშიც უწევდათ ყოფნა, რამაც არაერთის სიკვდილი გამოიწვია.

არსებობდა ცალკე ჯგუფი იმ ადამიანებისთვის, რომლებიც ციხიდან გაქცევას ეცადნენ. ისინი განავლით სავსე კონტეინერებს ეზიდებოდნენ, რომლებიც ხისგან იყო დამზადებული და იმდენად მძიმე იყო, რომ ორ ადამიანსაც უჭირდა ტარება. ისინი ყოველდღე ასრულებდნენ ამ სამუშაოს, მნიშვნელობა არ ჰქონდა, წვიმდა თუ თოვდა, მათ არ ჰქონდათ  შესვენების უფლება.” – იხსენებს ჰიე ვუ.

მან ასევე აღნიშნა, რომ უარავი ადამიანი ციხეში შიმშილისა და მცველებისგან ცუდი მოპყრობის გამო დაიღუპა.

ჰანა, ასევე ყოფილი პატიმარი, ამბობს, რომ ქრისტიანები მოთავსებულნი იყვნენ პატარა საკნებში და იმყოფებოდნენ სხვებისაგან იზოლირებულნი, მათ არ შეეძლოთ დაწოლა ან ფეხზე წამოდგომა.

„ჩვენ დაყოფილები ვიყავით სქესის მიხედვით, მე და ჩემი ქალიშვილი ერთად, ჩემი ქმარი და ვაჟი კი ერთად. ბანაკში მისვლიდან სულ ცოტა ხანში ვნახეთ, როგორ აიძულებდა მცველი ქრისტიანს, მოეკლა ბავშვი.

თითქმის ყოველდღე მივყავდით დაკითხვაზე, ისინი დაუნდობლად გვცემდნენ… როდესაც დაკითხვაზე არ მივყავდით, ჩვენ უნდა ვმდგარიყავით მუხლებზე დაჩოქილნი საღამოს ხუთიდან თორმეტ საათამდე და ხმა არ უნდა ამოგვეღო.“

ჰიე ვუ იხსენებს, რომ მათ არ ჰქონდათ ლოცვის უფლება.

„ცემაზე მეტად რთული ჩემთვის ლოცვის აკრძალვა იყო, ჩვენ არ შეგვეძლო ხმის ამოღება, ამიტომ გულში ვლოცულობდი. ვლოცულობდი, რომ დანგრეულიყო კერპთაყვანისმცემლობა და ადამიანებს მოენანიებინათ, ვლოცულობდი ციხიდან გათავისუფლებაზე და იმაზე, რომ ქრისტიანებს მთელი მსოფლიოდან, ეშუამდგომლათ ჩვენთვის ლოცვებში.“

პატიმრები, რომელთაც შეძლეს და სასწაულის დახმარებით თავი დააღწიეს საპატიმროს, ჰყვებიან იმ საშინელებათა შესახებ, რაც მათ ათწლეულების განმავლობაში გადახდათ თავს.

წყარო

თარგმანი: თეონა მენაბდიშვილი

რედაქტირება: მანანა ტვინიკაძე

 

„მფრინავი” სახარებები: სამხრეთ კორეის ეკლესიების გზავნილი ჩრდილოელ მეზობლებს

ჩრდილოეთ კორეა ქრისტიანობის ერთ-ერთი სასტიკად მდევნელი ქვეყანაა მთელ მსოფლიოში. ქრისტიანებს იქ სასიკვდილო სასჯელი ელით, მაგრამ ერთი ჯგუფი ახორციელებს საჰაერო ოპერაციებს ჩრდილოეთ კორეაში მცხოვრებ ქრისტიანთა მხარდასაჭერად. გთავაზობთ ექსკლუზიურ რეპორტაჟს მათი მუშაობის შესახებ.

ჩრდილოეთ კორეაში შობის ნაცვლად კიმ ჩენ ინის ბებიის 100 წლის იუბილე აღნიშნეს

ჩრდილოეთ კორეაში 25 დეკემბერს შობის ნაცვლად კიმ ჩენ ინის ბებიის 100 წლის იუბილე აღნიშნეს. კიმ ჩენ სუკი კომუნისტური რესპუბლიკის დამაარსებლის კიმ ირ სენის პირველი ცოლი იყო. მიიჩნევა, რომ ის 1917 წელს, შობის დღესასწაულზე დაიბადა.

კიმ ჩენ ინის ბებიის იუბილესთან დაკავშირებით ადგილობრივმა მედიამ კიმ ჩენ სუკის შესახებ არაერთი სტატია გამოაქვეყნა. პუბლიკაციებში აღნიშნულია, რომ კიმ ირ სენის ცოლი „შესანიშნავად ისროდა და მის მიერ მოკლული მტრების რაოდენობას ცარიელი ვაზნებით ითვლიდნენ”.

კიმ ჩენ სუკის საპატივსაცემოდ ფხენიანმა საიუბილეო მონეტები მოჭრა და საფოსტო მარკები დაბეჭდა.

ჩრდილოეთ კორეის ლიდერმა კიმ ჩენ ინმა ქვეყანაში შობის ნაცვლად თავისი ბებიის დაბადების დღის აღნიშვნის განკარგულება ოფიციალურად გასულ წელს გასცა. ჩენ სუკი იაპონიის წინააღმდეგ მებრძოლი პარტიზანი და კომუნისტი აქტივისტი იყო, რომელიც, მოგვიანებით, ჩრდილოეთ კორეის პირველ დიქტატორზე, კიმ ირ სენზე დაქორწინდა.

ჩენ სუკი, რომელსაც ჩრდილოეთ კორეაში „რევოლუციის წმინდა დედად“ მოიხსენიებენ, საეჭვო ვითარებაში გარდაიცვალა. 1949 წელს მოსახლეობას მისი საფლავი აჩვენეს და განაცხადეს, რომ ის მოკვდა. მას შემდეგ, ჩრდილოეთ კორეის ბევრი მცხოვრები კიმ ჩენ ინის ბებიის საფლავზე ყოველწლიურად დადის.

აღსანიშნავია, რომ კიმ ჩენ ინმა შობისადმი სიძულვილი 2014 წელსაც გამოამჟღავნა, როდესაც გაიგო, რომ სამხრეთ კორეა საზღვართან გრანდიოზული ნაძვის ხის აღმართვას აპირებდა. ამის გამო ის სამხრეთ კორეას ომითაც კი დაემუქრა.

შობის აღნიშვნა ჩრდილოეთ კორეაში 1950 წლიდან იკრძალება.

წყარო

კიმ იუნ ჯინი – ინტერვიუ ჩრდილოეთ კორეიდან გაქცეულ გოგონასთან

ლტოლვილი გოგონა ჩრდილოეთ კორეიდან, სამშობლოში დაბრუნებაზე და ქრისტიანობის ქადაგებაზე ოცნებობს.

ჩრდილოეთ კორეიდან გამოქცეული გოგონა: „მზად ვიყავით თავის მოსაკლავად”

იეონმი პარკი, რომელიც ჩრდილოეთ კორეაში დაიბადა და გაიზარდა, ფიქრობდა, რომ მისი სამშობლო საუკეთესო იყო მსოფლიოში. ყველაფერი მაშინ შეიცვალა, როცა დედამისმა მას თავისი თანამშრომლის დის წერილი წაუკითხა.

წერილში ეწერა: „მაშინ, როცა ამ წერილს წაიკითხავთ, ჩვენი ოჯახის ხუთი წევრი უკვე აღარ იქნება ცოცხალი, რადგან ბოლო სამი კვირის განმავლობაში არაფერი გვიჭამია. იატაკზე ვწევართ ერთად და ისე ვართ დასუსტებულნი, რომ სიკვდილს ველოდებით.“

„პირველად მაშინ გავიგე, რომ ჩემს ქვეყანაში მცხოვრები ადამიანები იტანჯებოდნენ“, ამბობს გოგონა.

2007 წელს, როცა გოგონა 14 წლის იყო, ის და მისი ოჯახი ჩინეთში გაიქცნენ ჩრდილოეთ კორეიდან. პარკი ამბობდა, რომ ის და დედამისი ფეხით გადავიდნენ გაყინულ მდინარეზე ჩინეთში მოსახვედრად.

ცოტა ხნის წინ ინტერნეტში გავრცელდა ვიდეო, სადაც ასახულია პარკის გამოსვლა 2014 წელს გამართულ მსოფლიოს ახალგაზრდულ სამიტზე: https://www.youtube.com/watch?v=ufhKWfPSQOw

სიტყვით გამოსვლისას პარკი საუბრობს ჩრდილოეთ კორეის მთავრობის მიერ განხორციელებულ ძალადობაზე: „ჩრდილოეთ კორეა ერთადერთი ქვეყანა მთელ მსოფლიოში, სადაც  ადამიანებს სიკვდილით სჯიან უნებართვო საერთაშორისო სატელეფონო ზარის გამო.“

„9 წლის რომ ვიყავი, ვნახე, როგორ დასაჯეს სიკვდილით ჩემი მეგობრის დედა. მისი დანაშაული ჰოლივუდის მიერ გადაღებულ ფილმის ყურება იყო“, ამბობს პარკი.

იეონმის მამა ჩინეთში ჩასვლის შემდეგ გარდაიცვალა. „მე დავმარხე ის, ღამით, სამ საათზე. სულ რაღაც 14 წლის ვიყავი მაშინ. ტირილიც კი არ შემეძლო, მეშინოდა, ისევ ჩრდილოეთ კორეაში არ დავებრუნებინე ვინმეს“, ტირილით ამბობს გოგონა სიტყვით გამოსვლისას.

ჩინეთში გოგონა და დედამისი ადამიანებით მოვაჭრეების ხელში მოხვდნენ. იეონმი მომსწრე გახდა იმისა, როგორ გააუპატიურა დედამისი ჩინელმა ადამიანებით მოვაჭრემ. დედამ თავისი გაუპატიურების უფლება მისცა მას იმისათვის, რომ თავისი გოგონა დაეცვა.

შემდეგ მონღოლეთში გაიქცა დედა-შვილი. იეონმი ამბობს, რომ ის და დედამისი დანებით იყვნენ შეირაღებულნი და ყოველთვის მზად იყვნენ თავის მოსაკლავად იმ შემთხვევაში, თუ ვინმე დაიჭერდა და ჩრდილოეთ კორეაში დაბრუნებას დაუპირებდა მათ.

„ჩვენ ადამიანურად ცხოვრება გვინდოდა. არც ერთი ადამიანი არ იმსახურებს დაჩაგვრას და შევიწროებას მხოლოდ იმის გამო, რომ ის ამა თუ იმ ქვეყანაში დაიბადა“, ამბობს იგი.

2015 წელს იეონმი პარკმა გამოაქვეყნა თავისი ავტობიოგრაფიული წიგნი „სიცოცხლისათვის: ჩრდილოეთ კორეელი გოგონას მოგზაურობა თავისუფლებისკენ“ (In Order to Live: A North Korean Girl’s Jouney to Freedom).

ამჟამად იეონმი კოლუმბიის უნივერსიტეტში ეკონომიკას სწავლობს.

წყარო: http://www1.cbn.com