ტეგების არქივი: ქრისტიანები

ერაყელი ქრისტიანები გაქრობის პირას არიან

ერაყის ქურთისტანის დედაქალაქ ერბილის არქიეპისკოპოსმა დიდი ბრიტანეთის ქრისტიანი ლიდერები დაადანაშაულა ერაყში ქრისტიანული თემის დაუცველად მიტოვებაში.

ემოციურ მიმართვაში სასულიერო პირი ბაშარ ვარდა აღნიშნავს, რომ 1400-წლიანი დევნის შემდეგ ქრისტიანები ერაყში გაქრობის პირას არიან.

„მას შემდეგ, რაც 2003 წელს აშშ-ის ინტერვენციის შედეგად სადამ ჰუესინის რეჟიმი დაემხო, ქრისტიანული თემი 83 %-ით შემცირდა 1.5 მილიონიდან 250.000 ადამიანამდე.“ განაცხადა ვარდამ.

მისი თქმით, ქრისტიანული ეკლესია ერაყში უძველესი თუ არა, ერთერთი ძველია და ის გაქრობის პირასაა. გადარჩენილები კი წამებისთვის მუდამ მზად უნდა იყვნენ. 

ბაშარ ვარდას განცხადებით, ისლამური სახელმწიფოს ჯიჰადისტები ქრისტიანების ფიზიკური არსებობისათვის უდიდეს საფრთხეს წარმოადგენენ. 2014 წლის თავდასხმის შემდეგ თავიანთი ისტორიული სამშობლოდან იძულებით გადაადგილდა 125, 000-ზე მეტი ქრისტიანი.

არქიეპისკოპოსმა ბრიტანეთის ქრისტიანი ლიდერები დაადანაშაულა საკითხის მიმართპოლიტკორექტულობაში“. მისი განცხადებით, ბრიტანეთი ისლამოფობიაში დადანაშაულების შიშით უარს ამბობს, ხმა აიმაღლოს ექსტრემიზმის წინააღმდეგ.

წყარო

თარგმანი: თამარ ცხოვრებაძე

რედაქტირება: მანანა ტვინიკაძე

CBN: ქრისტიანების ყოფა კომუნისტურ ჩინეთში

ბოლო ათწლეულებში მილიონობით ჩინელი შემობრუნდა ქრისტესკენ. ჩინეთის ახალი პრეზიდენტი სი ძინპინი ეკლესიის ზრდას კომუნისტური პარტიისთვის საფრთხედ მიიჩნევს.

ბოლო 20 წლის განმავლობაში, “CBN ნიუსმა” გააშუქა ე.წ. იატაკქვეშა ეკლესიების დიდი ზრდა ჩინეთში. ამ ოფიციალურად ათეისტურ ქვეყანაში მილიონობით ადამიანი გაქრისტიანდა. ექსპერტების განცხადებით, ის, რაც ახლა ხდება ჩინეთში, უპრეცედენტო გამოღვიძებაა, რომელიც, ფაქტობრივად, ქვეყნის ყველა კუთხეს შეეხო და 2030 წლისთვის ჩინეთის მოსახლეობის უმრავლესობა ქრისტიანი იქნება. მაგრამ ქვეყნის პრეზიდენტს ეკლესიათა ზრდის შეჩერება სურს.

2012 წელს მმართველობაში მოსვლისთანავე სი ძინპინმა ბრძანა ყოველი საოჯახო შეკრების დახურვა, რომელიც არ კონტროლდებოდა კომუნისტების მიერ.

მაშინ, როცა ქვეყანაში ნადგურდება ბიბლიები, იწვება ჯვრები, ქრისტეს გამოსახულებები იცვლება პრეზიდენტის გამოსახულებით, ვანგ ი, ერთ-ერთი ხუცესი, რომელიც დააკავეს, თამამად აცხადებს, რომ პრეზიდენტის ღვთიური სტატუსი მისთვის მიუღებელია და რომ ის თავის რწმენას შეინარჩუნებს, ამავდროულად, არ დაემორჩილება კანონს, რომელიც ბიბლიის წინააღმდეგ წასვლას აიძულებს.

რუსეთი პირველად დასახელდა იმ ქვეყნებს შორის, სადაც ქრისტიანები იდევნებიან

უკანასკნელი 7 წლის განმავლობაში პირველად რუსეთი იმ ქვეყნების სიაში მოხვდა, სადაც ქრისტიანებს ავიწროებენ.

საერთაშორისო ორგანიზაცია Open Doors-ის შეფასებით, ქრისტიანების რელიგიური ნიშნით დევნის შემთხვევები რუსეთის ფედერაციაში შემავალ ჩრდილოეთ კავკასიაში ბოლო პერიოდში გახშირდა, რის გამოც რუსეთი ყოველწლიურ რეიტინგში 50 ქვეყანას შორის 41-ე ადგილზე მოხვდა.

ანგარიშის მიხედვით, ქრისტიანებზე თავდასხმები მოხდა რუსეთის ფედერაციის შემადგენლობაში შემვალ მუსლიმანურ რესპუბლიკებშიც. მათ შორის დაღესტანში, თათრეთსა და ჩეჩნეთში. როგორც ავტორები აცხადებენ, განსაკუთრებით რთულია გაქრისტიანებული მუსლიმანების მდგომარეობა.

„მუსლიმანებს, რომელთაც ქრისტიანობა მიიღეს, უარყოფენ როგორც ოჯახის წევრები და ახლობლები, ასევე პედაგოგები. რეგიონებში ისინი თემიდან გარიყულები არიან“, – ნათქვამია ანგარიშში.

ანგარიშში ასევე ხაზგასმულია, რომ რუსეთის მართლმადიდებელ ეკლესიას ყველაზე ნაკლები პრობლემები აქვს ხელისუფლებასთან. თუმცა, დაურეგისტრირებელი ეკლესიების წარმომადგენლებს ხშირად უთვალთვალებენ.

Open Doors-ის რეიტინგის მიხედვით, ყველაზე დიდი საფრთხე ქრისტიანებს ჩრდილოეთ კორეაში ემუქრებათ, რომელიც სიის სათავეში უკვე მეთექვსმეტედ მოხვდა. ხუთეულში მოხვდნენ აგრეთვე ავღანეთი, სომალი, ლიბია და პაკისტანი.

სულ, იმ 50 ქვეყანაში, რომელიც ანგარიშში მოხვდა 700 მილიონი ქრისტიანი მორწმუნე ცხოვრობს, საიდანაც 200 მილიონს აღმსარებლობის გამო დევნიან.

წყარო

ვიეტნამში ბუდას თაყვანისცემაზე უარის თქმის გამო ქრისტიანებს სასტიკად სცემეს

ხუცესის თქმით, ვიეტნამის მთავრობამ რამდენიმე ქრისტიანს სასტიკად სცემა და დააკავა მას შემდეგ, რაც მათ ბუდიზმის მიმდევრობასა და ბუდის თაყვანისცემაზე უარი განაცხადეს.

ხუცესმა ჰვენგ ვან პამ ასევე აღნიშნა, რომ სოფელ ფა ლომში, ნოემბერში იმ 33 პროტესტანტ ქრისტიანს, რომლებმაც ბუდიზმზე უარი თქვეს, დაემუქრნენ.

პოლიციამ მოაგროვა პირადი ინფორმაცია ოცდაცამეტივე მორწმუნეზე და მათ წინააღმდეგ სასამართლო სახალხოდ მოაწყო. ოფიცრებმა ბუდას ქანდაკება მათ წინ გამოიტანეს და ქრისტეს ნაცვლად მისი თაყვანისცემა მოსთხოვეს. ოთხი ქრისტიანი დააკავეს და სცემეს. მთავრობა ნოემბრის განმავლობაში სხვა ქრისტიანებსაც დევნიდა.

როგორც ჯანგიმ, საერთაშორისო დისციპლინური ინსპექციის გუნდის წარმომადგენელმა განმარტა, ვიეტნამი კრძალავს პროტესტანტი ქრისტიანების რწმენას და დევნის მათ, რათა რწმენაზე უარი ათქმევინოს. 2018 წლის განმავლობაში მათ ასზე მეტი მორწმუნე გააძევეს იენ ბაის და ლაო კაის პროვინციებიდან.

„ქრისტიანები ხშირად იდევნებიან მთავრობისა და მეზობელი  ეთნიკური გაერთიანებებისგან. კომუნისტურ ქვეყანაში ქრისტიანობა არაპატრიოტულ მოძრაობად მიიჩნევა და ქრისტიანები დისკრიმინაციას, დევნას, პატიმრობასა და წამებას ხშირად განიცდიან ასეთ ქვეყნებში.“ – წერს სისხლის სამართლის საერთაშორისო სასამართლოს (ICC) რეგიონული მენეჯერი ჯინა გო.

2017 წელს ვიეტნამის პოლიცია ფიზიკურად გაუსწორდა კათოლიკური ეკლესიის მღვდლებს, რომლებიც იცავდნენ ეკლესიის ტერიტორიაზე აღმართულ ჯვარს.

ერთ-ერთმა მღვდელმა, ლოიმ რადიო “თავისუფალ აზიას” განუცხადა, რომ თავდასხმის დროს ადგილობრივი პოლიციის უფროსი და მისი მოადგილეც იმყოფებოდნენ.

ერთ-ერთმა მორწმუნემ, ბაომ, რომელიც „ამერიკის ღია კარების“ საზოგადოებასთან თანამშრომლობს (საერთაშორისო ქრისტიანული ორგანიზაცია), სიცოცხლის რისკის ფასად გასულ წელს 100 000-ზე მეტი საბავშვო ბიბლია დაურიგა დევნილებს.

„როცა ბიბლიებს დიდ ეკლესიებში ვარიგებ, ამას ისინი არა მხოლოდ უდიდეს პატივად მიიჩნევენ, არამედ ღვთის სიტყვის შესწავლის წყაროდ. მწამს, რომ ვიეტნამში მისი ზეგავლენა უფრო ფართოდ გავრცელდება. ღვთის სიტყვა ადამიანებისთვის მარტივად მისაწვდომი უნდა იყოს. საბავშვო ბიბლიები მათთვის ღვთის შეცნობისკენ მიმავალი გზაა. მჯერა, რომ ეს არის მთესველის მსახურება. ჩვენ ამ საქმეს კვლავ გავაგრძელებთ და უფალი იქნება ჩვენი დამხმარე.“ – თქვა ბაომ.

წყარო

თარგმანი: თიკა სხირტლაძე

რედაქტირება: მანანა ტვინიკაძე

 

 

BBC: ეგვიპტეში ქრისტიანების ავტობუსზე თავდასხმაში მონაწილე 19 ისლამისტი პოლიციასთან შეტაკებისას დაიღუპა

ეგვიპტეში ქრისტიანების ავტობუსზე თავდასხმაში მონაწილე 19 ისლამისტი სამხედრო პოლიციასთან შეტაკებისას დაიღუპა. ინფორმაციას BBC ეგვიპტის შინაგან საქმეთა სამინისტროზე დაყრდნობით ავრცელებს.

ეგვიპტის შსს-ს ცნობით, გაქცეული ტერორისტები მინიას პროვინციის დასავლეთით, უდაბნოს აფარებდნენ თავს, პოლიციის გამოჩენისას მათ ცეცხლი გახსნეს, საპასუხო სროლისას კი 19 ისლამისტი სამხედრო დაიღუპა.

შეგახსენებთ, რომ 2 ნოემბერს თავდასხმა მინიას პროვინციაში მოხდა, რომელიც კაიროდან სამხრეთით 260 კილომეტრის დაშორებით მდებარეობს. უცნობმა პირებმა ცეცხლი გაუხსნეს ავტობუსს, რომელსაც ქრისტიანები გადაჰყავდა. ავტობუსი წმინდა სამუელის სახელობის მონასტერში მიდიოდა.

თავდამსხმელებმა ცეცხლი იმ ადგილის მახლობლად გახსნეს, სადაც გასული წლის მაისში ისლამისტებმა 28 ადამიანი მოკლეს.  თავდასხმას, ბოლო მონაცემებით, შვიდი ადამიანი ემსხვერპლა. დაღუპულთა შორის სამი ბავშვია. არიან დაშავებულებიც. ავტობუსზე განხორციელებულ თავდასხმაზე პასუხისმგებლობა ტერორისტულმა დაჯგუფება „ისლამურმა სახელმწიფომ“ აიღო.

მომხდარს გამოეხმაურა ეგვიპტის პრეზიდენტი. აბდელ ფათახ ალ-სისიმ დაღუპლთა ოჯახის წევრებს მიუსამძიმრა და მთავრობას ტერორიზმის წინააღმდეგ კამპანიის გააქტიურებისკენ მოუწოდა.

 

ჩრდილოეთ კორეის საპატიმროებს გადარჩენილ ქრისტიანთა ისტორიები

ჩრდილოეთ კორეის საპატიმროებს გადარჩენილი ქრისტიანები აღწერენ, როგორ გადაიტანეს მტანჯველი წამება, როგორიცაა ვიწრო და პატარა საკნებში გამომწყვდევა, სადაც შეუძლებელია დაწოლა ან ფეხზე დგომა. ისინი მოწმობენ, რომ ციხის მცველები ქრისტიანს ბავშვის მოკვლასაც კი აიძულებდნენ.

ქრისტიანი ქალი, სახელად ჰიე ვუ (მისი ნამდვილი სახელი არ არის) ორგანიზაცია Open Doors USA-თან საუბრისას ამბობს, რომ მისი ქალიშვილი შიმშილისგან მოკვდა, 1997 წელს, ჩრდილოეთ კორეაში დიდი შიმშილობის დროს. მოგვიანებით მისი მეუღლე ჩინეთში გაიქცა, სადაც ის ქრისტიანი გახდა, მაგრამ დაიჭირეს და ჩრდილოეთ კორეის საპატიმროში გაგზავნეს, სადაც ის დაიღუპა კიდეც.

ქმრის მსგავსად, ჰიე ვუც გაიქცა ჩინეთში, მაგრამ ისიც დაიჭირეს და ჩრდილოეთ კორეაში დააბრუნეს, სადაც ციხეში აღმოჩნდა. ორგანიზაცია Open Doors USA-თან საუბრისას ის ციხეში გატარებულ დღეებს იხსენებს:

„საპატიმრო სხვადასხვა ნაწილად იყო დაყოფილი, ზოგიერთი სექტორი სამეურნეო საქმიანობისთვის იყო, ზოგიერთი – სამშენებლო, ზოგიც კი – მაღაროებში მუშაობისთვის. ქალები და კაცები ცალ-ცალკე იყვნენ, ყველა პატიმარი ისე გამოიყურებოდა, თითქოს სადაცაა სისუსტისგან გული წაუვიდოდათ, ყველა მათგანი უიმედო და სასოწარკვეთილი იყო და ამასთან ერთად მშიერიც.

თითოეული იღებდა ერთ მუჭა სიმინდს და რაღაც წვენს. მთელი წლის განმავლობაში ასე ვიკვებებოდით. პატიმრებს იმდენად შიოდათ, რომ მზად იყვნენ ყველაფრისთვის, ზოგიერთი მათგანი ძროხის განავალს ეძებდა, აგროვებდა და ჭამდა.

პატიმრები არა მხოლოდ მუშაობდნენ, არამედ ექსტრემალურ პირობებშიც უწევდათ ყოფნა, რამაც არაერთის სიკვდილი გამოიწვია.

არსებობდა ცალკე ჯგუფი იმ ადამიანებისთვის, რომლებიც ციხიდან გაქცევას ეცადნენ. ისინი განავლით სავსე კონტეინერებს ეზიდებოდნენ, რომლებიც ხისგან იყო დამზადებული და იმდენად მძიმე იყო, რომ ორ ადამიანსაც უჭირდა ტარება. ისინი ყოველდღე ასრულებდნენ ამ სამუშაოს, მნიშვნელობა არ ჰქონდა, წვიმდა თუ თოვდა, მათ არ ჰქონდათ  შესვენების უფლება.” – იხსენებს ჰიე ვუ.

მან ასევე აღნიშნა, რომ უარავი ადამიანი ციხეში შიმშილისა და მცველებისგან ცუდი მოპყრობის გამო დაიღუპა.

ჰანა, ასევე ყოფილი პატიმარი, ამბობს, რომ ქრისტიანები მოთავსებულნი იყვნენ პატარა საკნებში და იმყოფებოდნენ სხვებისაგან იზოლირებულნი, მათ არ შეეძლოთ დაწოლა ან ფეხზე წამოდგომა.

„ჩვენ დაყოფილები ვიყავით სქესის მიხედვით, მე და ჩემი ქალიშვილი ერთად, ჩემი ქმარი და ვაჟი კი ერთად. ბანაკში მისვლიდან სულ ცოტა ხანში ვნახეთ, როგორ აიძულებდა მცველი ქრისტიანს, მოეკლა ბავშვი.

თითქმის ყოველდღე მივყავდით დაკითხვაზე, ისინი დაუნდობლად გვცემდნენ… როდესაც დაკითხვაზე არ მივყავდით, ჩვენ უნდა ვმდგარიყავით მუხლებზე დაჩოქილნი საღამოს ხუთიდან თორმეტ საათამდე და ხმა არ უნდა ამოგვეღო.“

ჰიე ვუ იხსენებს, რომ მათ არ ჰქონდათ ლოცვის უფლება.

„ცემაზე მეტად რთული ჩემთვის ლოცვის აკრძალვა იყო, ჩვენ არ შეგვეძლო ხმის ამოღება, ამიტომ გულში ვლოცულობდი. ვლოცულობდი, რომ დანგრეულიყო კერპთაყვანისმცემლობა და ადამიანებს მოენანიებინათ, ვლოცულობდი ციხიდან გათავისუფლებაზე და იმაზე, რომ ქრისტიანებს მთელი მსოფლიოდან, ეშუამდგომლათ ჩვენთვის ლოცვებში.“

პატიმრები, რომელთაც შეძლეს და სასწაულის დახმარებით თავი დააღწიეს საპატიმროს, ჰყვებიან იმ საშინელებათა შესახებ, რაც მათ ათწლეულების განმავლობაში გადახდათ თავს.

წყარო

თარგმანი: თეონა მენაბდიშვილი

რედაქტირება: მანანა ტვინიკაძე

 

მოლდავეთში ქრისტიანები ლგბტ აღლუმის წინააღმდეგ გამოდიან

მოლდავეთის მართლმადიდებლური ეკლესია ხელისუფლებას სთხოვს აღკვეთოს მზადება სოლიდარობის მარშისათვის  „შიშის გარეშე”,  რომლის ჩატარებაც იგეგმება მე-17 ლგბტ ფესტივალის („Moldova Pride 2018“) ფარგლებში შაბათს, 19 მაისს. მიტროპოლიტი ვლადიმერი მიიჩნევს, რომ მსგავს ღონისძიებათა ჩატარება ნიშნავს „თავდასხმას მორალსა და ოჯახის წმინდა ინსტიტუტზე და წარმოადგენს საფრთხეს მოზარდი თაობისათვის.“

„უმცირესობის წარმომადგენელთა ეს მსვლელობა შეურაცხმყოფელი გამოწვევაა ჩვენი საზოგადოების დიდი ნაწილის ღირებულებებისათვის. ამ საზოგადოების  98% შედგება მართლმადიდებელი ქრისტიანებისგან წმინდა სახარების სწავლების მიმდევართაგან – სახარებისა, რომლის თანახმადაც ქორწინება მხოლოდ მამაკაცსა და ქალს შორის შეიძლება და არა ერთი და იმავე სქესის წარმომადგენელთა შორის“, – განაცხადა კიშინიოვის ეპისკოპოსმა.

„აღლუმის ორგანიზატორებმა და მათმა უცხოელმა მხარდამჭერებმა გასული წლების გამოცდილებიდან გამომდინარე, უნდა იცოდნენ ადგილობრივი რეალობის შესახებ, რადგან ასეთი მოვლენები ხდება მიზეზი ორ მხარეს შორის გამოვლენილი ძალადობისა და დაპირისპირებისა“, – განაცხადა მიტროპოლიტმა ვლადიმერმა.

გასულ წელს, მსგავსი მარში, რომელიც საპროტესტო მსვლელობათა ფონზე გაიმართა, დასრულდა მისი აღკვეთითა და ლგბტ თემის აქტივისტების გაქცევით.

წყარო

თარგმანი: სოფო გურაშვილი

რედაქტირება: ნინო ხუროშვილი

უნდა უყურონ თუ არა ქრისტიანებმა დისნეის ახალ მულტფილმს − „კოკო“?

არაკომერციული ორგანიზაცია Focus on the Family (ყურადღების ცენტრში მოაქციეთ ოჯახი) ქრისტიანებს აფრთხილებს Disney Pixar-ის ახალი ფილმის, „კოკოს“ შესახებ.

შერილ ვილჰელმიმ, ორგანიზაციიდან Focus on the Family Pluggedin, განაცხადა, რომ ფილმი ასახავს „სულიერ მსოფლმხედველობას, რომელიც ეწინააღმდეგება ქრისტიანულ სწავლებას“.

„კოკო“ ყველაზე პოპულარულ ფილმად იქცა მადლიერების დღესასწაულზე და 71, 2 მლნ დოლარი მოაგროვა.

მულტფილმის მთავარი გმირი, მიგელი, დამწყები მუსიკოსია და ოჯახის წინააღმდეგობის მიუხედავად, შედის „მკვდართა სამყაროში“, რათა ამოხსნას საიდუმლო იმასთან დაკავშირებით, თუ რატომ გაქრა მისი პაპა მუსიკალური კარიერის დაწყების შემდეგ.

„მიგელს სურს მუსიკალური კარიერის შექმნა, მაგრამ, თავდაპირველად, მან მკვდართა დღე უნდა აღნიშნოს“, განმარტა შერილ ვილჰელმიმ. მკვდართა დღე, რომელიც მექსიკაში ცნობილია, როგორც Dia de Muertos, გახლავთ კულტურული და რელიგიური ტრადიცია და აღინიშნება 1-2 ნოემბერს. ამ დღეებში ოჯახები ხშირად მიაგებენ პატივს თავიანთ გარდაცვლილ წინაპრებს და მათ საფლავებზე მიაქვთ საკვები, საჩუქრები და სურათები. ისინი მიიჩნევენ, რომ მკვდრები იღვიძებენ ამ დროის განმავლობაში და საზოგადოების ნაწილი ხდებიან, რათა თავიანთ ოჯახებთან ერთად მიიღონ მონაწილეობა ზეიმში.

ზოგიერთები ამტკიცებენ, რომ ამ დღის აღნიშვნა ერთგვარი „ქრისტიანული რელიგიაა“ და ლოიალურია რომაულ-კათოლიკური ეკლესიის მიმართ, რომლის სწავლებამაც გარკვეული ადაპტაცია განიცადა ლათინურ-ამერიკულ კულტურასთან შერწყმის შედეგად.

ქრისტიანული საგანმანათლებლო ვებგვერდი Got Questions ამტკიცებს, რომ ფილმი სრულიად არაბიბლიურია და ამისათვის მოჰყავს ციტატა ესაია წინასწარმეტყველის წიგნიდან: „ განა თავის ღმერთს არ ეკითხება ხალხი, განა მკვდრებს ეკითხება ცოცხალთა გამო?“ (ესაია 8:19)

მულტფილმში ასევე ჩანს აცტეკების რწმენის გადმონაშთები, რომლებსაც სწამდათ მკვდართა თაყვანისცემის.

„სწორედ ამიტომ, მიუხედავად მულტფილმის სილამაზისა და შთამბეჭდავი მომენტებისა, ის წარმართულ მსოფლმხედველობას ავრცელებს, რომელიც მკვეთრად ეწინააღმდეგება ქრისტიანულ რწმენას“, დასძინა შერილ ვილჰელმიმ.

წყარო

„წითელი ოთხშაბათი” – დიდ ბრიტანეთში დევნილ ქრისტიანებს იხსენებენ

22 ნოემბერს დიდ ბრიტანეთში საჯარო დაწესებულებები, ეკლესიები და სკოლები წითელ ფერში განათდა იმ ადამიანთა მხარდასაჭერად, რომლებიც საკუთარი რელიგიის გამო განიცდიან დევნასა და უსამართლობას.

აქცია კათოლიკური საქველმოქმედო ფონდის „გასაჭირში მყოფი ეკლესიის დახმარების“  ინიციატივით უკვე მეორე წელია ტარდება. დღეს წითელ ფერში განათდა ვესტმინსტერის სასახლე, ვესტმინსტერის სააბატო , კათოლიკური კათედრალი და ასევ სხვა საჯარო დაწესებულებები იმის აღსანიშნავად, რომ  ეკლესიას უნდა ახსოვდეს მსოფლიოს ის ნაწილები, სადაც რელიგიის თავისუფლება სულ უფრო და უფრო იზღუდება.

აქციის მიზანია მხარდაჭერა გამოხატოს საკუთარი რწმენის გამო დევნილების მისამართით, კიდევ ერთხელ უთხრას „არა” ძალადობას და შევიწროვებას, რომელიც რელიგიის სახელით ხორციელდება.

აქციაში მონაწილე ადამიანები სოლიდარობას წითელი ფერის სამოსის ჩაცმით გამოხატავენ, ლონდონში კი დღეს, სპეციალური მარშრუტით გაივლის წითელი ავტობუსი, რომელზეც იქნება წარწერა: „დავდგეთ რწმენისთვის და თავისუფლებისთვის.” ავტობუსი ლონდონის ღირსშესანიშნაობებთან  შეჩერდება, თავის სვლას კი წითლად განათებულ ვესტმისნსტერის სააბატოსთან დაასრულებს.

წყარო

იორდანიაში აღდგომის დღესასწაულზე მუსლიმანები იცავდნენ ქრისტიანულ ეკლესიებს

მაშინ, როდესაც მსოფლიოში ტერორისტული  აქტების შესახებ ინფორმაცია განუწყვეტლივ ვრცელდება და სიტყვა მუსლიმანი ავტომატურად ასოცირდება ტერორიზმთან, ახლო აღმოსავლეთში აღდგომის დღესასწაულზე მუსლიმანებმა გადაწყვიტეს ქრისტიანების დაცვა, რათა მათ მშვიდად შეძლებოდათ დღესასწაულის აღნიშვნა.

ეგვიპტეში, ორ კოპტურ ეკლესიასთან ახლოს, თვითმკვლელი ტერორისტის მიერ თავის აფეთქების შედეგად 45 ადამიანი დაიღუპა და 120 დაშავდა. ამ მოვლენიდან ერთ კვირაში The Jordan Times იუწყება, რომ მუსლიმი ახალგაზრდები მთელი სუნიტური სამყაროდან იყვნენ შეკრებილნი იორდანიაში თავიანთი ქრისტიანი მეზობლების დასაცავად აღდგომის დღესასწაულზე.

Times-ის ცნობით, ბალკას გამგებლის Fayez Ruqeidi-ს განცხადებით, სოლიდარობის აქტი  ხაზს უსვამს იორდანიის ერთიანობას და რეალურად ხელშესახებს ხდის რელიგიის თავისუფლებას ამ რეგიონში.

ბალკა არ იყო ერთადერთი რეგიონი, სადაც მუსულმანები იცავდნენ ქრისტიანებს აღდგომის დღესასწაულზე. ქალაქ აჯლუნში აქტივისტებმა The Jordan Times განუცხადეს, რომ ისინი ქალაქში იცავდნენ  ქრისტიანებს, რათა “აჩვენონ სამყაროს ჰარმონია და სადღესასწაულო განწყობა იორდანიაში”.  ქრისტიანებს ასევე იცავდნენ ქალაქ მადაბაში.

წყარო