ახალი ფილმი „ზაფხული ტყეში“ გვიამბობს რეალური საზოგადოების  შესახებ, სადაც განსაკუთრებული საჭიროების მქონე ადამიანებს შეუძლიათ დანარჩენებთან ერთად ჰარმონიაში ცხოვრება და მუშაობა.

დოკუმენტურ ქრისტიანულ ფილმში საუბარია ჟან ვანიეზე, კანადელ ქრისტიანზე, რომელმაც ეს საზოგადოება ჩამოაყალიბა.

ვანიემ დააარსა საზოგადოება „L’Arche“, რომელმაც ფიზიკურ და გონებრივ ნაკლოვანებათა მქონე ადამიანები იმ ადამიანებთან გააერთიანა, რომელთაც ეს ნაკლოვანებები არ აქვთ და სადაც მათ ერთად მუშაობა და ცხოვრება შეუძლიათ.

იდეა გაჩნდა მაშინ, როდესაც ვანიემ გაიგო იმ ადამიანთა მძიმე მდგომარეობის შესახებ, რომლებიც მან მოინახულა 1964 წელს პარიზთან ახლოს მდებარე ფსიქიატრიულ საავადმყოფოში. ამ ადამიანებს ხშირად „იდიოტებს“ ან „განდეგილებს“ ეძახდნენ და როგორც პატიმრებს, ისე კეტავდნენ; ხშირად კი მათ საერთოდ ივიწყებდნენ.

ამის შემდეგ, ჟან ვანიემ გადაწყვიტა დაეტოვებინა თავისი პრივილეგირებული ცხოვრება და საცხოვრებლად ტროსლი-ბროილში, პარიზიდან ჩრდილოეთით, მშვენიერი ტყის პირას მდებარე სოფელში გადასულიყო. მან ასევე თან გაიყოლა ორი გონებრივად ჩამორჩენილი კაცი.

სწორედ მაშინ მან ჩამოაყალიბა „L’Arche“, რაც ფრანგულად კიდობანს ნიშნავს. დღეს „L’Arche“ 147 თემს ითვლის 35 ქვეყანაში, რომელშიც დაახლოებით 5000 განსაკუთრებული საჭიროების მქონე ადამიანი ცხოვრობს.

შესანიშნავი ფილმი „ზაფხული ტყეში“ საზღვარგარეთ, კინოთეატრებში, 23 მარტიდან გამოვიდა, დაუნის სინდრომთან ბრძოლის დღესთან დაკავშირებით.

ტემპლტონოვის პრემიის (პრემიის, რომელიც გაიცემა სულიერ ცხოვრებაში გაკეთებული აღმოჩენებისთვის)  89 წლის მფლობელი ისევ ტროსლი-ბრეილში ცხოვრობს, სადაც ფილმის უდიდესი ნაწილი გადაიღეს. ჟან ვანიე ამბობს, რომ „ღვთის სამეფოს“ თითოეულ იმ ადამიანში ხედავს, ვინც „L’Arche“-ში ცხოვრობს.

„უფალ იესო ქრისტეს საიდუმლო დაფარულია სუსტ, უძლურ ადამიანებში“, – ამბობს ვანიე – „ამ ადამიანებმა, რომლებიც სოციალური კიბის ბოლოში არიან, მასწავლეს, თუ რას ნიშნავს, იყო პიროვნება – ისწავლო სიყვარული და ბარიერების გადალახვა.“

ფილმის ოთხი მთავარი გმირია – მიშელი, ადამიანი, რომელსაც აწვალებს მეორე მსოფლიო ომის მოგონებები; ანდრე, რომელსაც ძალიან სურს გოგონასთან პაემანი; დევიდი, რომელიც თავს სუპერგმირს უწოდებს და სურს მსოფლიოს გადარჩენა; პატრიკი, შთაგონებული მხატვარი.

წყარო

თარგმანი: თამუნა ბაღდავაძე

რედაქტირება: მანანა ტვინიკაძე

კინოკომპანიამ AFFIRM Films გამოუშვა ექსკლუზიური ტრეილერი ეპიკური ბიბლიური ფილმისა „პავლე, ქრისტეს მოციქული“.

ფილმში გაცოცხლებული იქნება ტარსუსელი სავლეს ამაღელვებელი ისტორია, კაცისა, რომელიც ერთ დროს ქრისტიანებს სდევნიდა და რომელიც შემდეგ ქრისტიანული ეკლესიის ერთ-ერთ ყველაზე მნიშვნელოვან და გავლენიან ფიგურად იქცა.

ფილმში „პავლე, ქრისტეს მოციქული“ ლუკას როლს თამაშობს მსახიობი ჯეიმს კევიზელი, ხოლო პავლეს როლს − ჯეიმს ფოლკნერი („სამეფო კარის თამაშები“). ფილმში ასევე მონაწილეობენ ოლივიერ მარტინეზი და ჯონ ლინჩი. ჯეიმს კევიზელს მსოფლიო აღიარება მოუტანა 2004 წელს იესოს ცხოვრების შესახებ გადაღებულ ფილმში − „ქრისტეს ვნებანი“ − ქრისტეს როლის შესრულებამ.

„პავლეს ცხოვრების თითოეული ასპექტი დაფუძნებულია იმაზე, რაც ბიბლიიდან ვიცით მის შესახებ და ჩვენ მოგითხრობთ ნამდვილ ამბავს, რომელიც ხდებოდა ხიფათით აღსავსე რომში ნერონის მიერ ქრისტიანთა დევნის პერიოდში. ესაა ემოციური, შთამბეჭდავი დრამა, რომელიც ბიბლიას აცოცხლებს ეკრანებზე“, განუცხადა ფილმის რეჟისორმა და სცენარის ავტორმა ენდრიუ ჰაიატმა გამოცემას The Christian Post.

ფილმი მოგვითხრობს რომის საპატიმროში მყოფი ტანჯული პავლეს შესახებ, რომელიც სიკვდილით დასჯას ელოდება იმპერატორ ნერონის მმართველობისას. მაურიტიუსი, ციხის ამბიციური პრეფექტი, კარგად ვერ ხვდება, რა სახიფათო შეიძლება იყოს ეს გატეხილი, ციხეში მყოფი ეს კაცი. ერთ დროს ის იყო ტარსუსელი სავლე, მაღალ თანამდებობაზე მყოფი და ქრისტიანთა მკვლელი, ახლა კი მისი ქრისტიანული რწმენა აზანზარებს რომს. დიდი რისკის ფასად, ექიმი ლუკა მოინახულებს პავლეს საპყრობილეში, რათა ნუგეში სცეს მას და ასევე ჩაიწეროს მისი წერილები მორწმუნეთა მზარდი თემისათვის გადასაცემად.

ფილმის გადაღებები მიმდინარეობდა მალტაში. პრემიერა შედგება აშშ-ს თეატრებში აღდგომას, 2018 წლის 28 მარტს.

წყარო

მოციქული პავლეს შესახებ ფილმის გადაღება მიმდინარეობს, მასში მსახიობი ჯეიმს ფოლკნერი (რომელიც ცნობილია თავისი როლებით „სამეფო კარის თამაშებსა“ და „დაუნტონის სააბატოში“) პავლე მოციქულის როლს ასრულებს, ხოლო ჯეიმს კევიზელი (იესოს როლის შემსრულებელი ფილმში „ქრისტეს ვნებანი“) ლუკა მახარობელს განასახიერებს.

აქამდეც არაერთი ფილმი გადაღებულა პავლე მოციქულსა და სხვა მოწაფეებზე, მაგრამ, როგორც ჩანს, დიდ ეკრანზე გამოსული ეს ფილმი მათგან განსხვავებული და არაჩვეულებრივი იქნება.
როგორც ცნობილია, ფილმს „პავლე, იესოს მოციქული“ ერქმევა და მასში ყურადღება გამახვილებული იქნება უკანასკნელ თვეებზე, რომელიც წინ უძღოდა მოციქულის აღსასრულს.

„იესო ქრისტეს შემდეგ ადრეული ეკლესიის ზრდაში არავის ჰქონია ისეთი ცენტრალური როლი, როგორც მოციქულ პავლეს, – ამბობს “affirm films executive”-ის ვიცე-პრეზიდენტი, – მან დაწერა ახალი აღთქმის უმეტესი ნაწილი და 10 000 მილზე მეტი გაიარა ფეხით, რათა ექადაგა იესო ქრისტეს სახარება. ფილმი სწორედ მისი ღვაწლის შესახებაა, ის ნათლად გადმოგვცემს მოციქულის უკანასკნელ თვეებსა და აღსასრულს.”

ფილმი ეკრანებზე 2018 წელს გამოვა.

წყარო

თარგმანი: სოფო წიკლაური

რედაქტირება: თეონა მენაბდიშვილი

ალბათ, გქონიათ სურვილი, თქვენი თვალით გენახათ, როგორ ესაუბრებოდა იესო სამარიტელ ქალს, დაგენახათ ჯვარი, რომელზეც მაცხოვარი კაცობრიობისთვის მოკვდა. რაოდენ დაუჯერებლადაც არ უნდა ჟღერდეს, ახლა ეს უკვე შესაძლებელია.

„იესო ვირტუალურ რეალობაში“ არის ქრისტეს ცხოვრების ამსახველი პირველი სრულმეტრაჟიანი ფილმი, რომელიც გადაღებულია მთლიანად 4k 360°-ით, ვირტუალურ რეალობაში. ფილმი 90 წუთის განმავლობაში გრძელდება და ქრისტეს ცხოვრების სხვადასხვა სცენებს ასახავს.

ის საშუალებას აძლევს მაყურებელს, რომ იხილოს იესოს ცხოვრება ისე, რომ თავადაც მის მონაწილედ იგრძნოს თავი. მაყურებელს შეუძლია იჯდეს მსმენელთა შორის მთაზე ქადაგების დროს. ის არის მხილველი სასწაულებისა და ესწრება საიდუმლო სერობასა და ჯვარცმას.

„ყველაფერი დაიწყო დროში უკან დაბრუნებისა და იესო ქრისტეს ამბის ახლებური გზით მოთხრობის იდეით. მჯერა, რომ ეს ტექნოლოგია არის შესაძლებლობა იესო ქრისტესთან უფრო ახლოს ყოფნისა. შენ ხომ საშუალება გეძლევა, იარო იესოსთან ერთად, იჯდე და უსმენდე მის ქადაგებას; ეს მართლაც საოცარი თავგადასავალი იქნება. ფილმის გადაღებებისას ყველანი განსაკუთრებულად ვიმოსებოდით, მე დიდ წვერს ვატარებდი და ხალხის მასაში ვიყავი, ჩვენ მინიმალურად ვიყენებდით მონტაჟს, გვსურდა რომ ყველაფერი ძალიან რეალური ყოფილიყო მაყურებლისთვის. საიდუმლო სერობის სცენა 14 წუთის განმავლობაში გრძელდება და ერთ დუბლშია გადაღებული, მინდოდა მაყურებელს ჰქონოდა იქ, მოვლენების ცენტრში ყოფნის შეგრძნება. მონტაჟის დროს ვტიროდი, ვაცნობიერებდი, რომ ეს ახალი შანსი იყო ადამიანებისთვის, რომ წმინდა წერილი მათ თვალწინ ახლებურად გაცოცხლებულიყო“, – განაცხადა ფილმის რეჟისორმა დეივიდ ჰენსონმა.

კინოკომპანია 20^th Century Fox  ჯოის სმიტის წიგნის „შეუძლებელის“ (The Impossible) ეკრანიზაციაზე მუშაობს. წიგნი, ისევე, როგორც ფილმი, მოგვითხროს რწმენისა და ლოცვის ძალის შესახებ.

ამჟამად ლიტერატურულ ნაწარმოებს დასაბეჭდად ამზადებენ. წიგნში ქალბატონი სმიტი მოგვითხრობს თავის ნამდვილ ისტორიას იმის შესახებ, თუ როგორ დაეხმარა ლოცვა შვილისათვის სიცოცხლის დაბრუნებაში. 2015 წლის დასაწყისში 14 წლის ჯონ სმიტი ჩავარდა ყინულის ქვეშ სენტ-ლუიზის ტბაში. მოზარდმა ცივ წყალში 15 წუთი გაატარა, რის შემდეგაც უახლოეს საავადმყოფოში გადაიყვანეს. თითქმის ნახევარი საათის განმავლობაში ექიმები ცდილობდნენ ჯონის გულის ამუშავებას, მაგრამ მათი ყველა ძალისხმევა უშედეგო აღმოჩნდა.

რეანიმაციული ბრიგადის ხელმძღვანელი უკვე  გარდაცვალების დროის გამოცხადებას აპირებდა, როდესაც პალატაში ბიჭუნას დედა შევიდა. სასოწარკვეთილებაში მყოფმა ჯოისმა ღმერთს მიმართა და რამდენიმე წამში ჯონს გული აუმუშავდა. ექიმების თქმით, ისინი ნამდვილი სასწაულის მომსწრენი გახდნენ, რადგან, საბოლოოდ, მოზარდს თავის ტვინის არანაირი დაზიანება არ აღმოაჩნდა.

ჯონ სმიტის სასწაულებრივად გადარჩენის შესახებ ამბავი აშშ-ის ყველა წამყვან საინფორმაციო სააგენტოში მოხვდა, რის შემდეგაც დედამისმა გადაწყვიტა იმ დღის მოვლენების აღწერა და წიგნად გამოცემა. გამოცემის უფლების მოსაპოვებლად აუქციონი გაიმართა, რომელზეც გამარჯვება გამომცემლობა Hachette Books-მა მოიპოვა. ჯოის სმიტის წიგნის გასაყიდად გამოსვლას უკვე წელს ელოდებიან.

„შეუძლებელის“ პროდიუსერი დევონ ფრანკლინი იქნება და ფილმი ეკრანებზე 2019 წლის აღდგომისთვის გამოვა. დევონ ფრანკლინს უკვე აქვს გამოცდილება მსგავსი ჟანრის ფილმებში. ის მონაწილეობდა ქრისტიანული დრამის „სასწაული ზეციდან“ (“Miracles from Heaven”) შექმნაში, რომელმაც 13 მილიონიანი ბიუჯეტით 73 მილიონ დოლარზე მეტი შემოსავალი მოუტანა თავის შემქმნელებს.

 

წყარო