ტეგების არქივი: რელიგია

რელიგიური უმცირესობები კონსტიტუციაში დაგეგმილ ცვლილებებს ეწინააღმდეგებიან

25 სექტემბერს, TDI-მ არასამთავრობო ორგანიზაციებთან, აკადემიურ ინსტიტუტებსა და იურისტებთან ერთად გაავრცელა განცხადება, რომელშიც მოუწოდებს საქართველოს პარლამენტს, გაითვალისწინოს რელიგიური გაერთიანებების, არასამთავრობო ორგანიზაციების, იურისტების, აკადემიური ინსტიტუტებისა და ვენეციის კომისიის რეკომენდაცია და რელიგიის თავისუფლებაში არამართლზომიერი ჩარევის საფრთხის შემცველი ნორმა იმგვარად შეცვალოს, რომ ის შეესაბამებოდეს ადამიანის უფლებათა ევროპული კონვენციით გათვალისწინებული რელიგიის თავისუფლების შეზღუდვის ლეგიტიმურ მიზნებს.

რელიგიური უმცირესობების წარმომადგნელები აკრიტიკებენ მუხლს, რომელშიც საუბარია რელიგიური თავისუფლების შეზღუდვაზე სახელმწიფო უსაფრთხოების გამო. მათ მიაჩნიათ, რომ კონსტიტუციაში არსებული ჩანაწერი, კონკრეტულად კი რელიგიური თავისუფლების შეზღუდვის ისეთი მიზეზები, როგორიცაა სახელმწიფო უსაფრთხოება, დანაშაულის თავიდან აცილება და მართლმსაჯულების განხორციელება, საერთაშორისო სტანდარტებს ეწინააღმდეგება.

დღესვე რელიგიური უმცირესობების წარმომადგენლები “რესპუბლიკური პარტიისა” და “ნაციონალური მოძრაობის” წევრებს შეხვდნენ. შეხვედრაზე განხილული იყო რელიგიის თავისუფლებისა და თანასწორუფლებიანობის დაცვის საკითხები ადგილობრივი თვითმმართველობის პოლიტიკის კონტექსტში.

წყარო

 

ჩინეთი, რელიგიასთან მიმართებით, ახალ, მკაცრ შეზღუდვებს ადგენს

ექსტრემიზთან ბრძოლის ფარგლებში, ჩინეთში  2018 წლის 2 თებერვლიდან ძალაში შევა ახალი შეზღუდვა რელიგიურ საქმიანობასთან დაკავშირებით.

The Gospel Herald ავრცელებს ინფორმაციას, რომ ჩინეთში შეიზღუდება რელიგიური შეკრებები, რელიგიური თემების განხილვა ინტერნეტით, რელიგიური ორგანიზაციების დაფინანსება, რელიგიურ სემინარებზე საზღვარგარეთ გამგზავრება და ღვთისმსახურება იმ ადგილებში, რომლებიც რეგისტრირებული არ არის.

„კოლექტიურმა და ინდივიდუალურმა რელიგიურმა საქმიანობამ არ უდნა წარმოქმნას კონფლიქტები და აზრთა სხვადასხვაობა განსხვავებულ რელიგიურ ჯგუფებში“, – ნათქვამია დადგენილებაში.

ხელისუფლებას მიაჩნია, რომ უკონტროლო ქრისტიანობა (ქრისტიანთა რიცხვი ჩინეთში უტოლდება კომუნისტური პარტიის წევრთა რიცხვს) ქვეყნის სტაბილურობისათვის დიდ საფრთხეს წარმოადგენს.

ამავდროულად, ჩინეთში მცხოვრები ქრისტიანები ოპტიმისტურად არიან განწყობილნი ახალი დადგენილების მიმართ. ისინი ფიქრობენ, რომ დევნისა და შევიწროების დროს სახარება მეტი სისწრაფით და ძალით ვრცელდება ქვეყანაში.

წყარო

თარგმანი: ბაჩუკი დოდაშვილი

რედაქტორი: მანანა ტვინიკაძე

„გირჩის“ ბიბლიური თავისუფლება, ანუ რელიგიურმა ორგანიზაციებმა პირველი-მეორეზე გავითვალოოოთ

პარადოქსების ქვეყანაში რომ ვცხოვრობთ, თითოეული ჩვენგანისთვის არახალია. ყური ისე მიეჩვია სიტყვათა უცნაურ თანწყობას, რომ აღარაფერი გვიკვირს. სამართლიანი სასამართლოს გარანტი რომ იტყვის, „დედა ნათესავი არააო”, მერე, ალბათ, აღარც „მცურავი ხე”, „მოძალადე კომბლე” და „რელიგიური გირჩი” გაგიკვირდება.
ამ დალოცვილ ქვეყანაში ისე აირია მონასტერი, რომ ძაღლი პატრონს და ციანიდი ადრესატს ვეღარ ცნობს. პარლამენტი ერთ დიდ სამკერვალო ფაბრიკად რომ გადაიქცევა, სადაც უკვე მერამდენედ მიმდინარეობს დაკემსილი, დაკერებული კონსტიტუციის გადაკეთება და ახალი მთავრობის ტანზე მორგება, ალბათ “გირჩის” ახალგამომცხვარი „რელიგია” ერთადერთი „იმედი” რჩება მათთვის, ვისაც რომელიმე ციხის საგუშაგოზე ერთი წლით უსასყიდლოდ დგომა არ სურს.

მოკლედ, ქვეყანაში საყოველთაო მხიარულებაა და რატომღაც ამ დროს რელიგიურმა ორგანიზაციებმა პირველი-მეორეზე უნდა გავითვალოთ, დაახლოებით ისე, ქმარზე გაბრაზებული დედა უდანაშაულო ბავშვებს რომ სჯის ხოლმე…

ხანდახან მგონია, რომ მართლაც ტოლერანტულ ქვეყანაში ვცხოვრობ… თავის კარგად წარმოჩენა და საგარეო იმიჯის მორგება ნამდვილად არავისგან რომ არ გვესწავლება, ისეთი ვიცით. ვამაყობთ ჩვენი ისტორიით, „ვეფხისტყაოსნით”, კოსმოსში მონავარდე „ჩაკრულოთი”, ღვინითა და სტუმართმოყვარეობით და როგორც კი რომელიმე ოფიციალური პერსონა ქვეყნის „კარს გაიხურავს”, სახეს ვკარგავთ. მერე „დედა ნათესავი არ არის”, ხეები დაცურავენ, კონსტიტუცია „გვიჭერს”, ინგა გრიგოლია „ქადაგებს” და რელიგიური ორგანიზაციები პირველი-მეორეზე ვითვლით…

p.s. სამსახურამდე ყოველდღე მიწისქვეშა გადასასვლელის გავლა მიწევს, იქ ნესტია და ბნელა. იქ მხვდებიან ერთი და იგივე ადამიანები, მოვაჭრეები, რომელთაც სხვა სამყარო არ გააჩნიათ, რომელთა ცა ბეტონია, მბჟუტავი ელნათურა – მზე და ჰაერი – ნესტი. არ მიკვირს, კუთხეში მჯდარი მომღერალი კაცი რატომ მღერის ყოველდღე: „ვაი, ვეღარ ვხედავ მზეს…” ქვეეყანაში კი საყოველთაო მხიარულებაა…

რედაქტირება: მანანა ტვინიკაძე

კონფერენცია ილიაუნში – „თავისუფლება და რელიგია გერმანიასა და საქართველოში“

20-21 აპრილს, ილიას სახელმწიფო უნივერსიტეტის წიგნის სახლში „ლიგამუსი“, ფრიდრიხ ნაუმანის ფონდის, სავლე წერეთლის ფილოსოფიის ინსტიტუტის, გერმანიის საელჩოს, ილიას სახელმწიფო უნივერსიტეტისა და ევანგელურ-ლუთერანული ეკლესიის ორგანიზებით, გაიმართა საერთაშორისო კონფერენცია „რელიგიური თავისუფლება გერმანიასა და საქართველოში“.

ხუთშაბათს, 20 აპრილს ჩატარდა ლექციები თემებზე: „თავისუფლება და რელიგია“, „რეფორმაციის თავისუფალმა აზროვნებამ (1517) ევროპა შეცვალა“, „ქრისტიანული ეკლესიის განვითარება და ცვლილება: როგორც დასავლეთის, ასევე, მართლმადიდებლური ეკლესიის გადმოსახედიდან“ და „ქართული მართლმადიდებლური ეკლესიის გზა წარსულსა და აწმყოში, პოლიტიკური და საზოგადოებრივი ცვლილებების გათვალისწინებით.“

კონფერენცის პირველ დღეს მომხსენებლები იყვნენ: პეტერ-ანდრეას ბოხმანი, ეპისკოპოსი ჰანს-იოახიმ კიდერლენი, პროფ. გიგა ზედანია, პროფ. ტასილო შმიდტიერი, პროფ. ათინა ლექსუტი, ასოც. პროფ. ლევან გიგინეიშვილი და ასოც. პროფ. სოფიო ზვიადაძე.

21 აპრილს 16:00 საათზე, საერთაშორისო კონფერენციის ფარგლებში გაიმართა სადისკუსიო პანელი „რელიგია და რეფორმა გერმანიასა და საქართველოში“. დისკუსიის განმავლობაში საუბარი მიმდინარეობდა იმის შესახებ, თუ რა გავლენა იქონია გერმანიასა და საქართველოში პარალელურად მინდინარე მოვლენებმა საზოგადოების ჩამოყალიბებასა და ღირებულებების განსაზღვრის პროცესში.

დისკუსიის მონაწილეები გახლდნენ: დავით უსუფაშვილი (პარლამენტის ყოფილი თავმჯდომარე), დოქტ. ირმგარდ შვაიცერი (გერმანიის ყოფილი ფედერალური მინისტრი; ევანგელური ეკლესიის წმინდა სინოდის ხელმძღვანელი), ბექა მინდიაშვილი (თეოლოგი, ილიას სახელმწიფო უნივერსიტეტი) და პროფ. დოქტ. ლუიზე შორნ-შუეტტე (გოეთეს უნივერსიტეტი ქ. ფრანკფურტი მაინზე).

 

წყარო

ომბუდსმენი: რელიგიის თავისუფლების კუთხით არსებული სისტემური პრობლემები უცვლელია

„რელიგიის თავისუფლების, ტოლერანტობის და თანასწორუფლებიანობის კუთხით არსებული სისტემური პრობლემები უცვლელია. რელიგიურ უმცირესობებს საკულტო თუ სხვა ტიპის ნაგებობების მშენებლობისას კვლავ ექმნებათ ბარიერები მშენებლობის ნებართვის გაცემაზე პასუხისმგებელი ადგილობრივი თვითმმართველობის ორგანოების მხრიდან“, ნათქვამია ომბუდსმენის ახალ, 2016 წლის ანგარიშში, რომელიც 2017 წლის 2 აპრილს გამოქვეყნდა.

„საჯარო სკოლებში რელიგიური უმცირესობანი ხშირად ხდებიან დისკრიმინაციული მოპყრობის მსხვერპლნი: ისინი ორგანიზებულად დაჰყავთ მართლმადიდებლურ ტაძრებში, ხდება მათი დალოცვა“, ნათქვამი იყო სახალხო დამცველის გასული წლის ანგარიშში.

სახალხო დამცველის თქმით, რელიგიურ უმცირესობათა წარმომადგენელი მოსწავლეები ხშირად იძულებულები ხდებიან არ გაამჟღავნონ აღმსარებლობა იმ მოტივით, რომ თავიდან აიცილონ უმრავლესობის მხრიდან გარიყვა და დისკრიმინაცია. რელიგიურ უმცირესობათა წარმომადგენლები ერიდებიან გადადგან რაიმე ქმედითი ნაბიჯები საკუთარ უფლებათა დასაცავად, რადგან მიაჩნიათ, რომ, ამ შემთხვევაში, ისინი უფრო მასშტაბური დისკრიმინაციის მსხვერპლნი აღმოჩნდებიან.

სახალხო დამცველის წლევანდელ ანგარიშში ნათქვამია, რომ რელიგიური თავისუფლების კუთხით არსებული პრობლემები უცვლელია. უჩა ნანუაშვილი მიიჩნევს, რომ დისკრიმინაციასთან ბრძოლის პროცესში ერთ-ერთი მნიშვნელოვანი გამოწვევა თანასწორობის საკითხებზე საზოგადოების ცნობიერების ამაღლება და შემწყნარებლური გარემოს ჩამოყალიბებაა.

წყარო

ვიქტორინა „ეთნოსები და რელიგიები საქართველოში“ სამცხე-ჯავახეთში

2017 წლის 11 მარტს, ახალციხეში ჩატარდა სახალხო დამცველთან არსებული ტოლერანტობის ცენტრის მიერ ორგანიზებული ვიქტორინა „ეთნოსები და რელიგიები საქართველოში“. კონკურსს უძღვებოდა ტოლერანტობის ცენტრის ხელმძღვანელი ბექა მინდიაშვილი.

2008 წელს სახალხო დამცველთან არსებულმა ტოლერანტობის ცენტრმა, გაეროს განვითარების პროგრამის მხარდაჭერით, მოამზადა და გამოსცა წიგნები „რელიგიები საქართველოში“ და „ეთნოსები საქართველოში“. პუბლიკაციებში ასახულია საქართველოში არსებული ყველა ეთნოსისა და რელიგიური გაერთიანების ისტორია, კულტურა და თანამედროვე ყოფა. ვიქტორინა სწორედ ამ წიგნებში ასახულ მასალებს ეფუძნება და მათ პოპულარიზაციას ისახავს მიზნად. უკვე ტრადიციად ქცეული ვიქტორინის მიზანია სკოლის მოსწავლეთა შორის საქართველოს რელიგიური და ეთნიკური მრავალფეროვნების შესახებ ცნობიერების ამაღლება და ტოლერანტული გარემოს შექმნის ხელშეწყობა.

„დღევანდელი ვიქტორინა გამორჩეულია, რადგან პირველად გაიმართა ახალციხეში. ასევე მნიშვნელოვანია, რომ ვიქტორინაში მონაწილეობას პირველად იღებენ ეთნიკურად სომეხი მოსწავლეები. მათ ძალიან კარგად იასპარეზეს და ურთულესი მასალა ქართულ ენაზე შესანიშნავად დაძლიეს,“ განაცხადა სახალხო დამცელთან არსებული ტოლერანტობის ცენტრის ხელმძღვანელმა ბექა მინდიაშვილმა კონკურსის შეჯამებისას.

ღონისძიება ჩატარდა აშშ-ის საერთაშორისო განვითარების სააგენტოს (USAID) მიერ დაფინანსებული საქართველოს გაეროს ასოციაციის (UNAG) პროექტის „ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის“ (PITA) ფარგლებში.

ვიქტორინა „ეთნოსები და რელიგიები საქართველოში“ სამცხე-ჯავახეთში 2017 წლის 11 მარტს, ახალციხეში ჩატარდა.

წყარო: http://tolerantoba.ge/