ტეგების არქივი: პროტესტანტული ეკლესია

შრი-ლანკაზე ბუდისტების ჯგუფმა დაანგრია პროტესტანტული ეკლესიის შენობა

პროტესტანტული სამლოცველო სახლი Kithu Sevana, რაც ნიშნავს ქრისტეს სახლს, გაანადგურა თორმეტმა ბუდისტმა, რომლებიც შემდეგ გირაოს სანაცვლოდ გაათავისუფლეს. მათ თავდასხმას, დაახლოებით, 200 მოწმე ჰყავდა. ინცინდენტი მოხდა პაჰარაიაში, შრი-ლანკას ჩრდილო-დასავლეთით არსებულ ერთ-ერთ სოფელში.

„თავიდან ისინი გვემუქრებოდნენ,“ თქვა კამალ ვასანტმა, თემის წინამძღოლმა, ყოფილმა ბუდისტმა, რომელიც ლოცვის მსახურებას უძღვება. „შემდეგ კი ხის ჯოხებით, რკინის ძალაყინებითა და დანებით მოვიდნენ და გაანადგურეს ყველაფერი. უფლის სახლი ჩვენ თვალწინ განადგურდა. უფალს ვთხოვდით, მიეტევებინა მათთვის“.

მიუხედავად ამ დანაშაულებრივი აქტისა, კამალ ვასანტი და ეკლესიის წევრები აცხადებენ, რომ არ აპირებენ რომ შური იძიონ ან საპასუხოდ რაიმე მოიმოქმედონ, რადგან შურისძიება უფალს ეკუთვნის. ისინი გააგრძელებენ თავიანთ საქმეს და ხის ქვეშ ილოცებენ. ვასანტმა განაცხადა, რომ ვერანაირი თავდასხმა ვერ შეაჩერებს მათ, ვერაფერი ჩამოშორებს მათ ღვთის სიყვარულისა და ლოცვისგან.

შრი-ლანკა (ცეილონი) სამხრეთ აზიის ქვეყანაა, სადაც, დაახლოებით, 22.2 მლნ მოსახლეა. მათგან 70% ბუდისტია, 13% – ინდუისტი, 10% –მუსლიმი, ხოლო 6% – ქრისტიანი კათოლიკეა. ბუდიზმი სახელმწიფოს ოფიციალური რელიგიაა. შრი-ლანკა, საქველმოქმედო ორგანიზაცია World Watch-ის სიის მიხედვით, 45-ე ქვეყანაა იმ 50 ქვეყნიდან, სადაც ქრისტიანები ყველაზე მეტად იდევნებიან. ორგანიზაცია აცხადებს, რომ „ბუდისტი ბერები, რომლებიც შრი-ლანკის სოფლებში დიდი გავლენით სარგებლობენ, ქრისტიანების ძირითადი მდევნელები არიან“.

წყარო: http://www.asianews.it/