ტეგების არქივი: მულტფილმი

„სუპერწიგნი” – მულტფილმი, რომელიც 35 წელს ითვლის

„სუპერწიგნი“ − მულტფილმი, რომელიც 35 წელს ითვლის, 1981 წლის შემოდგომით იაპონიაში ტელეეკრანებზე, ამერიკულ-იაპონური ქრისტიანული ანიმე „მფრინავი სახლი” გამოჩნდა. ერთდროულად, 8 მლნ-ზე მეტმა ადამიანმა უყურა სუპერწიგნის თავდაპირველ ვერსიას იაპონიის სატელევიზიო ეთერში, ხოლო ბიბლია ბესტსელერად იქცა ქვეყანაში.

„სუპერწიგნი“ გახლავთ სატელევიზიო ქრისტიანული ანიმაციური სერიალი, რომელიც შეიქმნა იაპონური კომპანია Tatsunoko Productions-ისა და ამერიკული ქრისტიანული სამაუწყებლო ქსელის Christian Broadcasting Network (CBN)-ის მიერ. თავისი არსებობის 30 წლის განმავლობაში მულტფილმი ნაჩვენები იქნა 106-ზე მეტ ქვეყანაში და ითარგმნა 43-ზე მეტ ენაზე, მათ შორის ქართულად.

1980-იანი წლების დასაწყისში იაპონელებმა შეწყვიტეს „სუპერწიგნის“ ჩვენება, მაგრამ სამი ათწლეულის შემდეგ მულტფილმის ახალი სერიები კვლავ დაბრუნდა იაპონიის ნაციონალური ტელევიზიის ეთერში გასულ შობას.

90-იან წლებში, საქართველოში, ქართულ ენაზე გახმოვანებული სუპერწიგნის თავდაპირველი ვერსია „მფრინავი სახლი” პირველი არხის ეთერში გავიდა. ანიმაციის გმირები დროში მოგზაურობდნენ მფრინავი სახლით და სასურველ დროდ ყოველთვის ძველი აღთქმის ეპოქას ან ქრისტეს მოღვაწეობის პერიოდს ირჩევდნენ, ეცნობოდნენ ბიბლიურ პერსონაჟებს, მათთან ერთად ეხვეოდნენ ფათერაკებში და უკან დაბრუნებულნი სულ სხვანაირად აღიქვამდნენ იმ პრობლემებსა და გამოწვევებს, რომლებიც მათ წინაშე იდგა.

დღეს უკვე შექმნილია მულტფილმის ახალი სერიები სამგანზომილებიანი გრაფიკით. განახლებული ანიმაციის პირველი სეზონი ქართულ ენაზე Jesus.Ge STUDIO-მ გაახმოვანა, რომელსაც ქართველი მაყურებელი მალე ტელეეკრანებზე იხილავს.

პირველი სეზონის საშობაო, მე-8 სერიის, სატელევიზიო პრეზენტაცია, შობის დღესასწაულზე 7 იანვარს, ტელეკომპანია „იბერიის“ ეთერით გადაიცა.

აღსანიშნავია, რომ „სუპერწიგნის” ახალი ვერსიის ქართულ ენაზე დუბლირებისთვის 20 მსახიობისგან შემდგარმა გუნდმა იმუშავა. სასიამოვნო დამთხვევაა, რომ მათ შორის არიან ის მსახიობებიც, რომლებიც 90-იან წლებში „მფრინავ სახლს” ახმოვანებდნენ.

კადრი ანიმაციიდან „მფრინავი სახლი”

„სუპერწიგნი”

სუპერწიგნი

„სუპერწიგნი“, ქართულ ენაზე დუბლირებული მრავალსერიანი მულტფილმი, რომელიც თარგმნილია 43 ენაზე და მსოფლიოს 106 ქვეყანაშია ნაჩვენები. მულტფილმი 30 წელია არსებობს, მათ შორის ქართველი მაყურებელი იცნობს მას „მფრინავი სახლის“ სახელწოდებით. ამჟამად გთავაზობთ ანიმაციის განახლებულ, საშობაო სერიას, 3D გრაფიკით.

Posted by Iberia TV on 2018 m. sausio 6 d., šeštadienis

 

P.S. Jesus.Ge STUDIO-ს შემოქმედებითი ჯგუფი იმედოვნებს, რომ ქართველ ბავშვებს მოეწონებათ მულტფილმი და სიამოვნებით იმოგზაურებენ დროში კრისთან, ჯოისა და გიზმოსთან ერთად.

უნდა უყურონ თუ არა ქრისტიანებმა დისნეის ახალ მულტფილმს − „კოკო“?

არაკომერციული ორგანიზაცია Focus on the Family (ყურადღების ცენტრში მოაქციეთ ოჯახი) ქრისტიანებს აფრთხილებს Disney Pixar-ის ახალი ფილმის, „კოკოს“ შესახებ.

შერილ ვილჰელმიმ, ორგანიზაციიდან Focus on the Family Pluggedin, განაცხადა, რომ ფილმი ასახავს „სულიერ მსოფლმხედველობას, რომელიც ეწინააღმდეგება ქრისტიანულ სწავლებას“.

„კოკო“ ყველაზე პოპულარულ ფილმად იქცა მადლიერების დღესასწაულზე და 71, 2 მლნ დოლარი მოაგროვა.

მულტფილმის მთავარი გმირი, მიგელი, დამწყები მუსიკოსია და ოჯახის წინააღმდეგობის მიუხედავად, შედის „მკვდართა სამყაროში“, რათა ამოხსნას საიდუმლო იმასთან დაკავშირებით, თუ რატომ გაქრა მისი პაპა მუსიკალური კარიერის დაწყების შემდეგ.

„მიგელს სურს მუსიკალური კარიერის შექმნა, მაგრამ, თავდაპირველად, მან მკვდართა დღე უნდა აღნიშნოს“, განმარტა შერილ ვილჰელმიმ. მკვდართა დღე, რომელიც მექსიკაში ცნობილია, როგორც Dia de Muertos, გახლავთ კულტურული და რელიგიური ტრადიცია და აღინიშნება 1-2 ნოემბერს. ამ დღეებში ოჯახები ხშირად მიაგებენ პატივს თავიანთ გარდაცვლილ წინაპრებს და მათ საფლავებზე მიაქვთ საკვები, საჩუქრები და სურათები. ისინი მიიჩნევენ, რომ მკვდრები იღვიძებენ ამ დროის განმავლობაში და საზოგადოების ნაწილი ხდებიან, რათა თავიანთ ოჯახებთან ერთად მიიღონ მონაწილეობა ზეიმში.

ზოგიერთები ამტკიცებენ, რომ ამ დღის აღნიშვნა ერთგვარი „ქრისტიანული რელიგიაა“ და ლოიალურია რომაულ-კათოლიკური ეკლესიის მიმართ, რომლის სწავლებამაც გარკვეული ადაპტაცია განიცადა ლათინურ-ამერიკულ კულტურასთან შერწყმის შედეგად.

ქრისტიანული საგანმანათლებლო ვებგვერდი Got Questions ამტკიცებს, რომ ფილმი სრულიად არაბიბლიურია და ამისათვის მოჰყავს ციტატა ესაია წინასწარმეტყველის წიგნიდან: „ განა თავის ღმერთს არ ეკითხება ხალხი, განა მკვდრებს ეკითხება ცოცხალთა გამო?“ (ესაია 8:19)

მულტფილმში ასევე ჩანს აცტეკების რწმენის გადმონაშთები, რომლებსაც სწამდათ მკვდართა თაყვანისცემის.

„სწორედ ამიტომ, მიუხედავად მულტფილმის სილამაზისა და შთამბეჭდავი მომენტებისა, ის წარმართულ მსოფლმხედველობას ავრცელებს, რომელიც მკვეთრად ეწინააღმდეგება ქრისტიანულ რწმენას“, დასძინა შერილ ვილჰელმიმ.

წყარო