ინდოეთის ოკეანეში კუნძულ სენტინელის აბორიგენებმა 26 წლის ამერიკელი ჯონ ჩაუ მოკლეს, რომელიც კუნძულზე ქრისტიანობის საქადაგებლად ჩავიდა. ჩაუს სიკვდილის შესახებ 21 ნოემბერს განაცხადეს.

კუნძულზე მცხოვრები სენტინელები წარმოადგენენ პატარა, იზოლირებულ ტომს, რომელთა ცხოვრების წესი ქვის ხანას შეესაბამება. 2006 წელს კუნძულზე ორი მეთევზე მოკლეს, რომელთა ნავი შემთხვევით მიუახლოვდა კუნძულის ნაპირს. ცხედრების წამოსაღებად მისულ ვერტმფრენს აბორიგენებმა ისრები დაუშინეს.

პოლიციის ცნობით, ჯონ ჩაუ ანდამანის კუნძულებზე ოქტომბერში ჩავიდა. 14 ნოემბერს ადგილობრივების დახმარებით, რომელსაც 25 ათასი რუპი გადაუხადა, ის სენტინელის კუნძულზე ჩავიდა. ნაპოვნია ჩაუს დღიური, რომლის ჩანაწერების მიხედვით, პირველი კონტაქტის დროს მას ზოგიერთი აბორიგენი მეგობრულად შეხვდა, თუმცა იყვნენ აგრესიულად განწყობილებიც. ჩაუ წერდა, რომ მას ისარი ესროლეს, რომელიც ბიბლიას მოხვდა.

16 ნოემბერს ჯონ ჩაუ კუნძულზე კვლავ დაბრუნდა და რამდენიმე საათში მეთევზეებმა, რომლებიც მას გადაადგილებაში ეხმარებოდნენ, დაინახეს, რომ აბორიგენები ცხედარს მიათრევდნენ, რომელიც ამერიკელს ჰგავდა. სავარაუდოდ, ჯონ ჩაუ ისრებით მოკლეს, თუმცა მისი ცხედრის პოვნა პოლიციამ ვერ მოახერხა და ამ ეტაპზე მისი გარდაცვალების ფაქტი ვერ დასტურდება.

ინდოეთის ხელისუფლებამ ამერიკელი მისიონერის ცხედრის საძიებო სამუშაოები შეაჩერა. მათი თქმით, ისინი აღარ შეაწუხებენ კუნძულ სენტინელზე მცხოვრებ აბორიგენებს. ინფორმაციას ამის შესახებ BBC ავრცელებს. ინდოეთის პოლიციამ დააკავა 7 კაცი, რომლებმაც ჯონ ჩაუ კუნძულზე ჩაიყვანეს, თუმცა იცოდნენ, რომ ეს აკრძალული იყო.

ჯონ ჩაუს ახლობლებმა მისი დაღუპვის შესახებ Instagram-ზე პოსტი გამოაქვეყნეს და ინდოეთის ხელისუფლებას დაკავებულების გათავისუფლება სთხოვეს. „მას ღმერთი უყვარდა, უყვარდა ცხოვრება და ეხმარებოდა გაჭირვებულს. ის არ განიცდიდა სენტინელების მიმართ არაფერს, გარდა სიყვარულისა. ჩვენ ვპატიობთ იმათ, ვისაც საზოგადოება დამნაშავედ მიიჩნევს.“ – წერია დაღუპულის ოჯახის პოსტში.

წყარო

ამერიკელი მისიონერი და რვა შვილის მამა, ჩარლზ ვესკო, კამერუნში, საკუთარი ცოლისა და შვილის თვალწინ მოკლეს.

ვესკო და მისი ოჯახი ინდიანიდან ერთი თვის წინ ჩავიდნენ კამერუნში, რათა მისიონერული მსახურება გაეწიათ აფრიკელი ერისთვის, ისინი ორი წლით დარჩენას გეგმავდნენ.

ვესკო ბამენდას გარეუბანში ცხოვრობდა, კამერუნის ჩრდილო-დასავლეთ ინგლისურენოვან რეგიონში, რომელშიც ბოლო ორი წლის განმავლობაში არეულობა და კონფლიქტია.

ვესკო და მისი მეუღლე სტეფანი, ერთ ვაჟთან და სხვა მისიონერთან ერთად, საყიდლებზე მიდიოდნენ, როდესაც მანქანას ცეცხლი გაუხსნეს. ვესკოს ორი ტყვია მოხვდა, ის სასწრაფოდ გადაიყვანეს საავადმყოფოში, ექიმების მცდელობა უშედეგო აღმოჩნდა და 43 წლის ვესკო გარდაიცვალა. მკვლელის ვინაობა დაუდგენელია.

ბოლო 18 თვის განმავლობაში, ძალადობის ფაქტები გახშირდა, 2 000-მდე ადამიანია მოკლული და 170 სოფელი – გადამწვარი კამერუნის ინგლისურენოვან რეგიონებში.

წყარო

შვეიცარიელი ქრისტიანი მისიონერის, ბეატრის სტოკლის, გატაცებიდან ერთ წლის შემდეგ გამოჩნდა ახალი ვიდეო, სადაც ის ამბობს, რომ „კარგად არის“ მიუხედავად თავისი არასახარბიელო მდგომარეობისა.

Middle East Monitor-ის ცნობით, ტვიტერში ვიდეო გაავრცელა ისლამის მაღრიბში არსებულმა ალ-ქაიდას საჰარის დანაყოფმა (Sahara division of al-Qaeda in the Islamic Maghreb (AQIM)) სამშაბათს, 10 იანვარს. ვიდეოში ვხედავთ, რომ სტოკლის შავი თავსაბურავი აქვს მოხვეული. ის ოდნავგასაგონი ხმით, ფრანგულად ლაპარაკობს.

ბეატრისი ამბობს, რომ გატაცებიდან 365 დღე გავიდა. ის თავისი ოჯახის წევრებს ესალმება და შვეიცარიის ხელისუფლებას მადლობას უხდის „გამოჩენილი ძალისხმევისთვის“.

„მე კარგად ვარ“, დასძენს იგი.

ალ-ქაიდას განცხადებით, ისინი ქრისტიან მისიონერს მალიში დატყვევებული ალ-ქაიდას სამხედრო პირთა და ჰააგაში დაპატიმრებულ მათი ერთ-ერთ ლიდერის სანაცვლოდ გაათავისუფლებენ, თუმცა შვეიცარიამ მოითხოვა, რომ ბეატრის სტოკლი ყოველგვარი პირობების გარეშე გაათავისუფლონ.

ბეატრის სტოკლი ქრისტიანი მისიონერია, რომელმაც თავისი საქმიანობა აფრიკაში დაიწყო 2002 წელს. პირველად ის 2012 წელს გაიტაცეს ჯიჰადისტებმა ჩრდილოეთ მალიში. ის ორი კვირის შემდეგ გაათავისუფლეს. მან ისევ მალიში დარჩენა გადაწყვიტა.

წყარო: http://www.gospelherald.com/