ტეგების არქივი: იუბილე

სქსკ-ს ორგანიზებით საბაუნიში რეფორმაციის 500 წლისთავისადმი მიძღვნილი კონფერენცია გაიმართა (ვიდეო)

3 და 4 ნოემბერს, სულხან-საბა ორბელიანის სასწავლო უნივერსიტეტში საქართველოს ქრისტიან სტუდენტთა კავშირის მიერ ინიცირებული, რეფორმაციის 500 წლისთავისადმი მიძღვნილი სამეცნიერო კონფერენცია „რეფორმაციის 500 წელი და საქართველო“    ჩატარდა.

კონფერენციის მიზანი საქართველოში რეფორმაციის მემკვიდრეობის და კვალის შესწავლა და გაანალიზება გახლდათ. კონფერენციის მომხსენებელთა შორის იყვნენ როგორც სამეცნიერო და არასამთავრობო, ასევე სასულიერო წრეების წარმომადგენლები.

ორგანიზაცია ICEJ იერუსალიმის დაბრუნების 50 წლის იუბილეს აღნიშნავს

28 მაისს ორგანიზაცია „საერთაშორისო ქრისტიანული საელჩო იერუსალიმიდან“ (ICEJ) ისრაელის დედაქალაქ იერუსალიმის დაბრუნებისა და გაერთიანების 50 წლის იუბილეს აღნიშნავს.

საზეიმო ღონისძიება ქალაქ თბილისში სახარების რწმენის ეკლესიაში 18 საათზე გაიმართება. მოწვეული სტუმრები იქნებიან: ისრაელის ელჩი შაფთაი ცური, სახალხო დამცველი უჩა ნანუაშვილი და რელიგიის საბჭოს წარმომადგენლები.

სპიკერები იქნებიან: საქართველოს სახარების რწმენის ეკლესიის ეპისკოპოსი ოლეგ ხუბაშვილი, ეკლესია „სიცოცხლის სიტყვის” უფროსი ხუცესი მამუკა ჯებისაშვილი, გივი ქუთელია (ორგანიზაცია „Ezra georgia” წარმომადგენელი) და სტანისლავ მაილიანი (საერთაშორისო ორგანიზაციის „Ebenezer” საქართველო-სომხეთის წარმომადგენელი).

საზეიმო ღონისძიებას გაუძღვება სახარების რწმენის ეკლესიის მგალობელთა გუნდი ნინო გოგსაძის ხელმძღვანელობით და ასევე სახარების რწმენის ეკლესიის ბავშვთა გუნდი „ცისარტყელა“.

ქრისტიანული მედია Jesus.Ge შვიდი წლისაა

დღეს დამოუკიდებელი ქრისტიანული მედია პორტალი Jesus.ge შვიდი წლის გახდა. უკვე წლებია თქვენთან ერთად ვიზრდებით და ვვითარდებით ჩვენო, ძვირფასო მკითხველო!

ინტერნეტმედიაჯგუფი “ჯიზესჯი” 2010 წელს ჩამოყალიბდა. ჯგუფი სრულ ენთუზიაზმზე იყო დაფუძნებული და იბრძოდა ერთი მიზნისთვის – თავისუფალი , ქრისტიანული მედიისთვის, რომელიც იქნებოდა სხვადასხვა მცირე ეკლესიების და განსხვავებული , ქრისტიანული დენომინაციების “ხმა” საქართველოში.

Jesus.Ge არის განსხვავებული მედია იმ კუთხით, რომ ის წარმოადგენს, არადენომინაციურ, პროტესტანტულ დამოუკიდებელ მედიასაშუალებას, რომელიც მოიცავს ვებგვერდს, რადიოს და ჟურნალს.

ყველაფერი 2009 წელს დაიწყო, როდესაც საქართველოში ინტერნეტი ბევრი ადამიანისთვის გახდა ხელმისაწვდომი. მუშაობის 7 წლის მანძილზე ჯგუფმა უამრავი დაბრკოლება და ცვლილება გამოიარა, თუმცა ერთი რამ უცვლელი იყო – ღვთის სიტყვის , იმედის და მხნეობის მიტანა საზოგადოებისთვის.

გარკვეული პერიოდი ჯგუფს სტუდიისა და აპარატურის გარეშე უწევდა მუშაობა, ხშირად გადაღება, ჩაწერა და გახმოვანება ნათხოვარი აპარატურით ხორციელდებოდა. მიუხედავად უამრავი სკეპტიკური აზრისა, ამ იდეამ ხორცი შეისხა და ერთ–ერთ , თამამად შეიძლება ითქვას ყველაზე ცნობილ, პროტესტანტულ ბრენდად იქცა საქართველოში.

მადლობას გიხდით ერთგულებისთვის, მხარდაჭერისთვის და გამხნევებისთვის. თითოეული თქვენგანი ჩვენი სტიმული და გამხნევება ხართ, თქვენი თითოეული კომენტარი, მოწონებული თუ გაზიარებული მასალა უფრო აღვივებს ჩვენს ენთუზიაზმს.

საქართველოს ქრისტიან სტუდენტთა კავშირი 20 წლისაა

საქართველოს ქრისტიან სტუდენტთა კავშირი 3 დეკემბერს 20 წლის ხდება. იუბილესთან დაკავშირებით ორგანიზაცია მიღებას სასტუმრო „გოლდენ პალასის“ საკონფერენციო დარბაზში, 18:00 საათზე გამართავს.

„მობრძანდით და დაპატიჟეთ მეგობრები. ეს იქნება სქსკ-ს ისტორიის, ჩვენი ისტორიის და ღმერთის საქმეების გახსენების ზეიმი. ჩვენ ღრმად გვწამს, რომ სქსკ არ არის ოფისის კედლები, არც გენერალური მდივანი, თანამშრომლები ან სათათბირო. სქსკ ხარ შენ და ჩვენ, ყველა ერთად. სწორედ ამიტომ, გთხოვთ ჩაინიშნოთ ეს თარიღი და გელით მთელი გულით!” – ნათქვამია ორგანიზაციის ფეისბუკის გვერდზე.

საქართველოს ქრისტიან სტუდენტთა კავშირი არის არასამთავრობო, არაკომერციული, სტუდენტური ორგანიზაცია, რომლის მისიაა ქრისტიანული ცხოვრების პრინციპების დანერგვა სტუდენტებს შორის. სქსკ-ს მიზნად ისახავს ყველა საუნივერსიტეტო ქალაქში დაფუძნებას და თავისი ჩართულობით სტუდენტების დახმარებას პროფესიული განვითარებისა და ქრისტიანული ფასეულობების შეთავსებაში.

სქსკ ხშირად მართავს სხვადასხვა სემინარებს ახალგაზრდებისთვის, ასევე ახორციელებს სხვადასხვა პროექტებს და ამზადებს ლიდერებს. ორგანიზაცია ამჟამად მოღვაწეობს საქართველოს სამ საუნივერსიტეტო ქალაქში: თბილისში, ბათუმსა და გორში.

შეგახსენებთ, რომ ორგანიზაციამ მოღვაწეობა საქართველოში 1990-იან წლებში დაიწყო, როდესაც, რამდენიმე სტუდენტის ინიციატივით, აღმოსავლეთმცოდნეობის ინსტიტუტში ბიბლიის შემსწავლელი ჯგუფი ჩამოყალიბდა. მათ მისიონერთა ხუთკაციანი ჯგუფი ეხმარებოდა IFEს-იდან (International Fellowship of Evangelical Students), თუმცა საქართველოში არსებული სამოქალაქო ომის პირობებში ორგანიზაციის საბოლოო ჩამოყალიბება ვერ მოხერხდა. მოგვიანებით, გერმანელმა მისიონერმა წყვილმა, ვერნერ და დითლინდ ბადერშნაიდერებმა, შეძლო საქართველოში ქრისტიან სტუდენტთა კავშირის შექმნა.

jesus.ge-ს გუნდი ულოცავს სქსკ-ს 20 წლის იუბილეს.