ტეგების არქივი: თურქეთი

CNN: თურქეთის სასამართლომ გაათავისუფლა ამერიკელი ხუცესი ენდრიუ ბრანსონი

ამერიკელი ხუცესი ენდრიუ ბრანსონი, რომელიც გარკვეულ პოლიტიკურ ჯგუფებთან კავშირის ბრალდებით დააპატიმრეს ორი წლის წინ და დაადანაშაულეს თურქეთის პრეზიდენტის, რეჯებ ტაიპ ერდოღანის წინააღმდეგ შეთქმულების მოწყობის მცდელობაში, თავისუფალია.

ბრანსონს სასამართლომ მისცა უფლება, სურვილის შემთხვევაში, დატოვოს თურქეთი და აშშ-ში დაბრუნდეს. მისი ადვოკატის თქმით, პასტორი თურქეთს დატოვებს.

პარასკევს, 12 ოქტომბერს, სასამართლომ ბრანსონს სამი წლითა და ერთი თვით თავისუფლების აღკვეთა შეუფარდა, თუმცა შემდეგ მიიჩნია, რომ მან ეს სასჯელი უკვე მოიხადა და გაათავისუფლა, თუმცა პროკურორები ბრანსონისთვის ათწლიან პატიმრობას მოითხოვდნენ.

ამერიკის პრეზიდენტმა, დონალდ ტრამპმა ტვიტერში დაწერა: „ვლოცულობ და ვფიქრობ ხუცეს ბრანსონის შესახებ და იმედი გვაქვს, რომ მალე შინ მშვიდობით დაბრუნდება.“

ენდრიუ ბრანსონმა კი განაცხადა: „მე უდანაშაულო ვარ. მიყვარს უფალი იესო. მიყვარს თურქეთი.“

ენდრიუ ბრანსონი 23 წლის განმავლობაში ცხოვრობდა თურქეთში თავის მეუღლესა და სამ შვილთან ერთად.

ამერიკელი ხუცესი კვლავ რჩება ერდოღანის ტყვედ

ამერიკელი ხუცესი ენდრიუ ბრანსონი კვლავ ციხეში რჩება. მას ბრალი ედება იმაში, რომ თითქოს ის იყო 2016 წელს სამხედრო გადატრიალების მცდელობის სულისჩამდგმელი. ამ ბრალდებას ამერიკის კანონისა და მართლმსაჯულების ცენტრი „სასაცილოს“ უწოდებს. ბრანსონი ფაქტობრივად, ტყვეა და ერდოღანი მას სატყუარად იყენებს. ენდრიუ ბრანსონის მომდევნო სასამართლო განხილვა შედგება 12 ოქტომბერს და ამერიკის ხელისუფლება იმედოვნებს, რომ მას მალევე გაათავისუფლებენ. ზოგი ფიქრობს, რომ ბრანსონის პატიმრობა კიდევ ერთი ნიშანია პრეზიდენტ ერდოღანის ანტაგონისტური განწყობისა დასავლეთის მიმართ.

ამერიკელ ხუცესს, შესაძლოა, თურქეთის ციხეში მთელი სიცოცხლის გატარება მოუწიოს

ამერიკელმა ხუცესმა, ენდრიუ ბრანსონმა, თავისი სიცოცხლის დარჩენილი ნაწილი შეიძლება თურქეთის ციხეში გაატაროს. იმ ფაქტს, რომ ის ქრისტიანია და ქრისტიანი ხუცესია, უთანაბრებენ ტერორიზმს. მის მიმართ გამოიყენება ისეთი ტერმინები, როგორებიცაა არატრადიციული ომის აგენტი, რომელიც მოქმედებს ევანგელისტური ეკლესიის ხუცესის ნიღაბს ამოფარებული და ის აქტივობანი, რომლებსაც ისინი ტერორისტულ აქტებს უწოდებენ, სინამდვილეში გახლავთ ჰუმანიტარული დახმარების, განათლებისა და პროფესიონალური მომზადების ორგანიზება.

____________________________________________________

თარგმანი: ნინო ხუროშვილი.

გახმოვანება: ნატალია ჩიქოვანი.

ხმის ინჟინერი: ბაჩუკი დოდაშვილი.

მონტაჟი: დავით წულუკიანი.

თურქეთი, შესაძლოა, განგებ აკავებს ამერიკელ ქრისტიან მისიონერს

თურქეთის ხელისუფლებას, შესაძლოა, უსაფუძვლოდ ჰყავდეს დაპატიმრებული ამერიკელი მისიონერი ხუცესი ენდრიუ ბრანსონი აშშ-ზე პოლიტიკური შურსძიების მიზნით, რადგანაც აშშ თავშესაფარს აძლევს ქვეყნიდან წასულ თურქ სასულიერო პირს, ფეტულა გულენს.

ბრანსონი, რომელიც 23 წლის განმავლობაში ცხოვრობდა თურქეთში და ქალაქ იზმირის ქრისტიანულ ეკლესიას უძღვებოდა, 2016 წლის ოქტომბრიდან მოყოლებული დაკავებულია. თურქეთის ხელისუფლება აცხადებს, რომ მას, შესაძლოა, ტერორისტულ დაჯგუფებასთან ჰქონდეს კავშირი.

ამერიკის კანონისა და სამართლიანობის ცენტრი მოითხოვს ბრანსონის გათავისუფლებას და ამტკიცებს, რომ ასეთ კავშირთა არსებობა არ დასტურდება.

თურქეთის პრემიერ-მინისტრს, ბინალი ილდირიმს, ბრანსონის საქმესთან დაკავშირებით, შეკითხვები დაუსვეს ჟურნალისტებმა. ამის შესახებ წერს ტოდ ნეტლტონი, აშშ-ს წამებულთა ხმის წარმომადგენელი.

„საინტერესოა, რომ უცბად პრემიერ-მინისტრმა ფეტულა გულენის საქმეზე დაიწყო ლაპარაკი. გულენი თურქი სასულიერო პირია, რომელიც ამჟამად აშშ-ში, გადასახლებაში ცხოვრობს. თურქეთმა მისი დეპორტაცია მოითხოვა, თუმცა აშშ-ს მთავრობამ ამაზე უარი განაცხადა. ამრიგად, ბრანსონზე საუბრისას, თურქეთის პრემიერ-მინისტრი მოულოდნელად გულენს შეეხო და თან დასძინა, რომ რასაკვირველია, ამ ორ საქმეს ერთმანეთს არ უკავშირებს.“

თურქეთმა გულენი ტერორისტთა რიცხვს მიაკუთვნა, ხოლო აშშ უარს ამბობს თურქეთისათვის მის გადაცემაზე და უკანასკნელი 17 წლის განმავლობაში პენსილვანიაში ცხოვრების ნებას აძლევს.

ბრანსონის მეუღლემ და ქალიშვილმა პრეზიდენტ ტრამპს სთხოვეს მოახდინოს ზეწოლა თურქეთის ხელისუფლებაზე, რათა მან გაათავისუფლოს უსაფუძვლოდ დაკავებული მისიონერი.

წყარო: http://www.christianpost.com