ტეგების არქივი: ბიბლია

„პატიმრები სიცოცხლეს იესო ქრისტეს უძღვნიდნენ“ − ირანელი ხუცესი რწმენის გამო ციხეში გატარებულ დღეებს იხსენებს

მოჯტაბა ჰუსეინი ერთ დროს იატაკქვეშა საშინაო ეკლესიის მოძრაობის ერთ-ერთი ხელმძღვანელი იყო ირანში.

2005 წელს იგი „ეროვნული უსაფრთხოებისათვის საფრთხის შექმნის“ ბრალდებით დააპატიმრეს.

ცოტა ხნის წინ ჰუსეინმა ორგანიზაცია „ღია კარებს“ უთხრა, რომ განზრახული აქვს განაგრძოს შრომა იმისათვის, რომ ირანში ეკლესია გაიზარდოს, მიუხედავად ისლამური მთავრობის მიერ განხორციელებული დევნისა.

„რატომ არ შევწყვიტე შრომა ეკლესიებისთვის მას შემდეგ, რაც პირველად დამაპატიმრეს?“ – ღიმილით აღნიშნა მოჯტაბამ ინტერვიუში. „ზუსტად არ ვიცი. არ არსებობს ლოგიკური ახსნა ამისათვის, მაგრამ ვიგრძენით, რომ უფალს სურდა გაგვეგრძელებინა შრომა და ისიც ვიცოდით, რომ ნებისმიერ დროს შეიძლებოდა დავეპატიმრებინეთ.“

სწორედ უფალმა მოუწოდა ციხეში მყოფ ჰუსეინს, რომ იქ მყოფი სხვა ადამიანებისთვისაც ეუწყებინა უფლის შესახებ. ბევრი ინანიებდა და ლოცულობდა. ჰუსეინს უნდოდა ბიბლიები დაერიგებინა პატიმრებისათვის, მაგრამ ამის შესაძლებლობა არ არსებობდა. შემდეგ ღმერთმა გასაოცარი გზით მოუვლინა დახმარება მას. საპატიმროს იმამმა, რომელიც გაოცებული იყო ღვთისადმი მათი ერთგულებით, დახმარება შესთავაზა მათ. მას ბიბლიის ფურცლების ქსეროასლები შეჰქონდა ციხეში და ამბობდა, რომ ეს ინგლისური ენის გაკვეთილები იყო.

ჰუსეინის ერთ-ერთი მეგობარი, რომელიც იმავე საკანში იყო, წმინდა წერილს სპარსულად თარგმნიდა. შემდეგ ჰუსეინმა გადაიღო ბიბლიის ფურცლების ასლები და პატიმრებს დაურიგა.

ბიბლიებს სხვა საკნებში მყოფი პატიმრებიც ითხოვდნენ.

„არასოდეს მითხოვია უფლისათვის, რომ ციხიდან გავეთავისუფლებინე. შემიძლია უფალს ყველგან ვემსახურო, ციხეშიც და მის გარეთაც. შემიძლია ღმერთის სასუფეველს ვემსახურო იქ, სადაც უფალი ისურვებს.“ – ამბობს ჰუსეინი.

 

წყარო

თარგმანი: ხატია ბარბაქაძე

რედაქტირება: მანანა ტვინიკაძე

1.5 მილიარდ ადამიანს ჯერ კიდევ არ აქვს ბიბლია თავის მშობლიურ ენაზე

რამდენ ადამიანს არ აქვს ბიბლია თავის მშობლიურ ენაზე?

ინგლისურ ენაზე, მაგალითად, არსებობს ბიბლიის 120 სხვადასხვა თარგმანი, მაგრამ ყველასთვის ასე როდია.

სინამდვილე ის გახლავთ, რომ მსოფლიოში 1.5 მილიარდ ადამიანს (ხუთი ადამიანიდან ერთი) არ აქვს თავის ენაზე ბიბლიის წაკითხვის საშუალება.

ეს სერიოზულად აბრკოლებს სახარების გავრცელებას მსოფლიოში. სწორედ ამის გამოსასწორებლად შრომობს ორგანიზაცია „უიკლიფის ბიბლიის მთარგმნელები“.

როცა ბიბლია ითარგმნება ამა თუ იმ ენაზე, ღირსშესანიშნავი მოვლენები ხდება. ბიბლიასთან შეხვედრა რადიკალურად ცვლის ადამიანებისა და საზოგადოებათა ცხოვრებას.

უიკლიფის ბიბლიის მთარგმნელებს უამრავი შთამბეჭდავი ისტორია აქვთ. ერთი მათგანი მოხდა ერთ მუსლიმანურ სოფელში (რომელსაც არ ვასახელებთ უსაფრთხოების მიზნით). უიკლიფის მთარგმნელებს უნდოდათ შეემოწმებინათ, რამდენად სწორად თარგმნეს მათეს სახარება ადგილობრივ ენაზე. ზოგადად, ადგილობრივ საზოგადოებაში თარგმანის შემოწმება ბიბლიის თარგმნის პროცესის განუყოფელ და აუცილებელ ნაწილს შეადგენს, რადგან თარგმანი არა მხოლოდ თეოლოგიურად ზუსტი უნდა იყოს, არამედ მისი მნიშვნელობა სრულიად მკაფიო უნდა გახლდეთ ამ ენაზე მოლაპარაკე ადამიანებისათვის. ძირითადად, ადგილობრივი ქრისტიანები ეხმარებიან მთარგმნელებს ამ საქმეში, მაგრამ ეს ყოველთვის როდია შესაძლებელი. ჩვენს შემთხვევაში, ამ სოფლის იმამმა, მუჰამედმა, გამოთქვა ამ საქმეში მონაწილეობის სურვილი.

მათეს სახარების კითხვის დროს იმამი დიდი გულისყურით ისმენდა და თავის აზრს გამოთქვამდა იესოს სიტყვებთან დაკავშირებით. ერთობლივი მუშაობის მესამე დღეს, იმამს ეტყობოდა, რომ რაღაც აწუხებდა და აფიქრებდა. ბიბლიის მთარგმნელებმა კითხვა შეწყვიტეს და იმამს ჰკითხეს, თუ რატომ აღარ უგდებდა ყურს. მან კი უპასუხა: „გისმენთ. უბრალოდ, ეს სიტყვები ძალიან დიდი ძალის მქონეა და მაიძლებს, დავფიქრდე ჩემს ცხოვრებაზე“.

მათეს სახარების და მოგვიანებით, იოანეს სახარების წაკითხვის შემდეგ იმამმა თქვა: „როცა ბიბლიის თარგმნას დაასრულებთ, ეს ქალაქი გაიგებს ჭეშმარიტებას და შეიცვლება. ეს იქნება ჩვენი რელიგიის სიკვდილი“.

აი, სწორედ ასეთ დიდი ძალა აქვს ღვთის სიტყვის თარგმნას თითეული ადამიანის მშობლიურ ენაზე და სწორედ ამიტომაც არის ბიბლიის თარგმნის უწყვეტი პროცესი აუცილებელია იმისათვის, რომ ყველას მისწვდეს სახარების უწყება მთელ მსოფლიოში.

გაიგეთ უფრო მეტი უიკლიფის ბიბლიის მთარგმნელების შესახებ ვებგვერდზე: wycliffe.org.uk

 

წყარო

თარგმანი: ნინო ხუროშვილი

49 დღე ღია ზღვაში – რას ჰყვება 18 წლის გადარჩენილი ბიჭი

18 წლის ინ­დო­ნე­ზი­ე­ლი მო­ზარ­დი ალდი ნო­ველ ადი­ლან­გი 14 ივლისს, სა­კუ­თარ სა­თევ­ზაო ნავ­ზე იმ­ყო­ფე­ბო­და, რო­დე­საც ძლი­ე­რი ქა­რის გამო ნავ­საბ­მე­ლი გა­წყდა და სათევზაო ნავი ტალღებმა გაიტაცა. ალდიმ  49 დღე დაჰყო ზღვაში და გადარჩა.

მოზარდი სათევზაო ნავზე მუშაობდა, რომელსაც არც ძრავი აქვს და არც ნიჩბები. მისი მოვალეობა ნავზე სინათლის ანთება იყო თევზების მოსაზიდად. ბიჭის თქმით, მას თან მცირეოდენი საკვები, ტანსაცმელი, რადიო და ბიბლია ჰქონდა. მთელი  ამ დროის განმავლობაში თევზებით იკვებებოდა, ნა­ვის ფიც­რებს წვავ­და და და­ჭე­რილ თევზს ცე­ცხლზე ამ­ზა­დებ­და.

ადილანგი იხსენებს, რომ 10-ზე მეტმა გემმა ჩაუარა, თუმცა ის ვერავინ შენიშნა. ზღვაში 7 კვირის გატარების შემდეგ, 31 აგვისტოს იგი პანამის დროშის ქვეშ მცურავი სატვირთო გემის ეკიპაჟმა გუამის წყლებში აღმოაჩინა.

გემის კაპიტანმა 6 სექტემბერს მოზარდი იაპონიაში ჩაიყვანა და ოსაკაში მდებარე ინდონეზიის საკონსულოს თანამშრომლებს გადასცა. მალევე ადილანგი თვითმფრინავით ინდონეზიაში გაამგზავრეს, სადაც მას ოჯახის წევრები დახვდნენ.

ახალი ამბების ადგილობრივმა სააგენტომ ინტერვიუ ჩამოართვა ადილანგს, რომელმაც თქვა, რომ ეგონა მოკვდებოდა ღია ზღვაში. მან თქვა, რომ თვითმკვლელობის შესახებაც კი ფიქრობდა; ფიქრობდა წყალში გადამხტარიყო, თუმცაღა მას გაახსენდა თავისი მშობლების რწმენა და ბიბლია გადაშალა ნუგეშის მისაღებად.

“ადილანგის გაუჩინარების შესახებ ნავის მეპატრონისგან გავიგეთ. დავნებდით, ღმერთის ნებას მივენდეთ და ვლოცულობდით მისთვის. ახლა ის კვლავ ჩვენთანაა.“ – ამბობს ადილანგის დედა.

ბიჭის ჯანმრთელობას საფრთხე არ ემუქრება. ის თავს კარგად გრძნობს.

წყარო

ჩინეთში ბიბლიის ონლაინ ყიდვა აიკრძალა

ჩინეთის ხელისუფლებამ ქვეყანაში ბიბლიის გაყიდვა ინტერნეტ-მაღაზიებში აკრძალა. გამოცემა UCA News-ის ცნობით, ამჟამად ბიბლიის ონლაინ  შეძენა შეუძლებელია, ისეთ დიდ პორტალებზეც კი, როგორიცაა Taobao ან Amazon-ი.

ჩინეთში ბიბლიას მანამდე მხოლოდ ოფიციალურ ქრისტიანულ ეკლესიებში ყიდდნენ, თუმცა ინტერნეტში მის გავრცელებაზე მკაცრი კონტროლი განსაკუთრებით ბოლო წლების განმავლობაში გაიზარდა.

სამშაბათს გამოქვეყნებული ოფიციალური მონაცემებით ჩინეთში 38 მლნ პროტესტანტი და 6 მლნ კათოლიკეა.
ზოგიერთი გამოთვლით კი 90 მლნ ქრისტიანია ჩინეთში.

თეთრ სახლში ბიბლიის შემსწავლელი ჯგუფი ჩამოყალიბდა

ტრამპის ადმინისტრაცია აშშ-ის პირველი მმართველი გუნდია 100 წლის განმავლობაში, რომელმაც თეთრ სახლში ბიბლიის შემსწავლელი ჯგუფი ჩამოაყალიბა.

მას ისტორიაში ყველაზე „ევანგელისტური კაბინეტი” ეწოდა. ესენი არიან ქალები და მამაკაცები, რომლებიც დარწმუნებით საუბრობენ საკუთარ რწმენასა და ბიბლიაზე.

„ესენი არიან ღვთისმოსავი ადამიანები, რომლებსაც ღმერთმა გამოსაჩენ თანამდებობებზე მოუწოდა ჩვენს კულტურაში. ისინი დიდი დაკვირვების შედეგად აარჩიეს პრეზიდენტმა დონალდ ტრამპმა და ვიცეპრეზიდენტმა მაიკ პენსმა.” – განაცხადა რალფ დროლინგერმა.

დროლინგერი NBA-ის ყოფილი მოთამაშეა, რომელმაც დააფუძნა Capitol Ministries, რომელსაც საფუძვლად უდევს იდეა იმის შესახებ, რომ უნდა შეიცვალოს კანონმდებელთა ხასიათი და გული, რათა ქრისტიანული მსოფლმხედველობის მიხედვით წარმართო პოლიტიკის საქმეები.

მან წამოიწყო ბიბლიის შემსწავლელი ჯგუფები ამერიკის 40 შტატის კაპიტოლიუმში და რამდენიმე უცხოურ კაპიტოლიუმში. ბიბლიის ყოველკვირეული შესწავლა იმართება აშშ-ის წარმომადგენელთა პალატასა და სენატში და ახლა უკვე პრეზიდენტ ტრამპის კაბინეტის მრავალი წევრისთვის.

ჯანდაცვის მინისტრი ტომ პრაისი, ენერგეტიკის მინისტრი რიკ პერი, განათლების მინისტრი ბეტსი დევოსი, სოფლის მეურნეობის მინისტრი სანი პერდუ, ცენტრალური სადაზვერვო სააგენტოს დირექტორი მაიკ პომპეო – ეს არის იმ ადამიანების მოკლე ჩამონათვალი, რომლებიც ბიბლიის შესწავლას ესწრებიან.

ეს ძალიან დიდი და მნიშვნელოვანი სიახლეა, რადგან აღმასრულებელი კაბინეტის წევრებისათვის ოფიციალური ბიბლიის შესწავლა არ ჩატარებულა უკანასკნელი ასი წლის განმავლობაში.

ამერიკის გენერალური პროკურორი ჯეფ სეშენსიც ესწრება ამ სწავლებას.

„ის იმ დღესვე პრაქტიკულად ახორციელებს იმას, რასაც ბიბლიიდან ვასწავლი და როცა ამას ვხედავ, ვფიქრობ, ღმერთო ჩემო, ესენი არიან ერთგული, მეგობრული და სწავლისათვის მზადმყოფი ადამიანები და ისინი ბიბლიის ყოველკვირეულ შესწავლას ესწრებიან“, – ამბობს დროლინგერი.

პრეზიდენტი ტრამპიც მოწვეულია ბიბლიის სწავლებაზე. ყოველკვირეულად მას დროლინგერის სწავლების ასლს უგზავნიან.

ვიცეპრეზიდენტი პენსიც გეგმავს სწავლებაზე დასწრებას, როგორც დატვირთული სამუშაო გრაფიკი მისცემს მას ამის შესაძლებლობას. გარდა ამისა, ის აფინანსებს ამ სწავლებას.

მაიკ პენსი, დროლინგერის აზრით, ჰგავს ბიბლიურ პერსონაჟებს – დანიელს, მორდექაის, იოსებს… ადამიანებს, რომლებიც მაღალ თანამდებობებს იკავებდნენ ისტორიაში.

„მაიკ პენსი სათანადო პატივისცემით ეკიდება საკუთარ თანამდებობას. ის ასევე ყოველთვის სათანადოდაა ჩაცმული, როგორც იოსები, რომელიც საგულდაგულოდ მოემზადა ფარაონის წინაშე წარსადგომად“, – უთხრა დროლინგერმა CBN-ის ახალ ამბებს.

„მაიკ პენსს ახასიათებს უკომპრომისო უდრეკობა და მისი საუბარი ყოველთვის ადამიანების მიმართ სიყვარულს გამოხატავს,“ – განაგრძობს დროლინგერი. „ის ძალიან მნიშვნელოვანი პიროვნებაა პრეზიდენტისათვის.“

„ღმერთს მადლობას ვუხდი მათთვის. მადლობას ვუხდი მაიკ პენსისთვის, რადგან მან და პრეზიდენტმა დიდებული ადამიანები აარჩიეს ჩვენი ერის ხელმძღვანელებად.“

სულ ცოტა 100 წელია გასული მას შემდეგ, რაც აშშ-ის პრეზიდენტის ადმინისტრაცია ბიბლიის გაკვეთილებს თეთრ სახლში ბოლოს ატარებდა.

საფრანგეთი: მოსწავლეთათვის ბიბლიის კითხვის გამო მასწავლებელი სამსახურიდან გაათავისუფლეს

საფრანგეთის ცენტრალურ რეგიონში არსებული დაწყებითი სკოლის მასწავლებელი სამსახურიდან გაათავისუფლეს მშობლების ბრალდების საფუძველზე, რომლის მიხედვითაც ის თავის მოსწავლეებს ბიბლიიდან მუხლებს უკითხავდა.

ორმოცი წლის მასწავლებელი მრავალი წლის განმავლობაში მუშაობდა პატარა ქალაქ მალიკორნეს დაწყებით სკოლაში. ცოტა ხნის წინ მშობლების ჯგუფმა იჩივლა იმის შესახებ, რომ მასწავლებელი ბიბლიიდან ციტატებს უკითხავდა 9-11 წლის ასაკის ბავშვებს. მშობლებმა ერთობლივი საჩივარი შეადგინეს, ხოლო სკოლის დირექტორმა სამსახურეობრივი გამოძიების ჩატარება გადაწყვიტა. მასწავლებლის სახელი და ის, თუ, სახელდობრ, რის ციტირებას ახდენდა ის ბიბლიდან, პრესაში არ ვრცელდება.

მშობლებმა მასწავლებელი დაადანაშაულეს პროზელიტიზმში და ამტკიცებდნენ, რომ ის მოსწავლეებს თავს ახვევდა საკუთარ რელიგიურ შეხედულებებს. დირექტორმა მასწავლებელი სამსახურიდან გაათავისუფლა ანტიკლერიკალიზმის კანონის დარღვევის გამო, რომელიც მოითხოვს რელიგიისა და განათლების მკაფიო გამიჯვნას.

სკოლის დირექტორმა განაცხადა, რომ სამსახურეობრივი გამოძიების შედეგები მარტის შუა რიცხვებისათვის გახდება ცნობილი.

ამავდროულად, ქალაქის მერმა ჟან-პოლ ბალერუმ აღნიშნა, რომ ხსენებულ მასწავლებელს დიდად აფასებენ თავად მოსწავლეები და მშობლები. სამსახურიდან მის გათავისუფლებას მერმა ‘მეტისმეტად მკაცრი სასჯელი უწოდა’.

წყარო: http://www.christiantoday.com/
https://www.francebleu.fr/

ბრაზილიაში ყოველდღიურად ბიბლიის 18 600 ეგზემპლარი იბეჭდება

ბრაზილიის ბიბლიური საზოგადოება ყოველდღიურად ბიბლიის 18 600 ეგზემპლარს ბეჭდავს ლათინური ამერიკის ძირითად ენებსა და რამდენიმე ბრაზილიურ დიალექტზე.

ლათინური ამერიკის ბიბლიის გამოცემის უმსხვილესი ფაბრიკა მდებარეობს ბრაზილიის ქალაქ ბარურიში, სან-პაულუს პროვინციაში. გასულ წელს აქ გამოიცა ახალი აღთქმის და მთლიანად ბიბლიის 6,8 მლნ ეგზემპლარი.

აქ 30 ენაზე იბეჭდება ბიბლიები, მათ შორის ინგლისურად, ესპანურად, პორტუგალიურად, არაბულად, ივრითულად, იორუბას დიალექტზე (რომელზეც აფრიკაში ლაპარაკობენ) და ასევე, ბრაზილიაში გავრცელებულ ძირითად დიალექტებზე.

ქრისტიანული საგამომცემლო ბიზნესი კრიზისს განიცდის უკანასკნელი ხანების განმავლობაში, რადგან ბევრი მორწმუნე ბეჭდური გამომცემლობებიდან გადადის სმარტფონებში არსებულ მობილურ აპლიკაციებზე. მიუხედავად ამისა, ლათინურ ამერიკაში იზრდება მოთხოვნა ბეჭდვით გამოცემებზე.

ბრაზილიის ბიბლიური საზოგადოების პროდუქციის 20% მსოფლიოს ასზე მეტ ქვეყანაში გადის, დანარჩენი კი თავად ბრაზილიაში იყიდება.

უკანასკნელ ხანებში ბრაზილია ეკონომიკურ კრიზისსა და კრიმინალის ზრდას განიცდის, მაგრამ, მიუხედავად ამისა, სულ უფრო და უფრო მეტი ადამიანი უძღვნის თავს ღმერთს.

წყარო: http://impactoevangelistico.net

მერიემ იბრაჰიმი: „ბიბლიას საიდუმლოდ ვკითხულობდი სიკვდილმისჯილთა საკანში“

სუდანელი ქრისტიანი ქალი, მერიემ იბრაჰიმი, რომელსაც სასიკვდილო განაჩენი გამოუტანეს 2014 წელს ამერიკელ ქრისტიანზე გათხოვების გამო, პატიმრობაში გატარებულ დღეებს იხსენებს. ის ამბობს, ღამღამობით როგორ კითხულობდა ბიბლიას, რომელსაც მისი საიმედო მუსლიმანი მეგობარი საგულდაგულოდ მალავდა ციხის ადმინისტრაციისგან. იბრაჰიმი 2014 წლის ივნისში გაათავისუფლეს და ის ახლა ვირჯინიაში ცხოვრობს.

2014 წელს მირიამს მათრახის 100 დარტყმა და ჩამოხრჩობა მიუსაჯეს ქორწინების გარეშე კავშირისა და ისლამზე უარის თქმის გამო. სინამდვილეში კი იგი დაქორწინებული იყო ქრისტიან ამერიკელზე, მაგრამ შარიათის სასამართლომ მათი ქორწინება არ ცნო.

გასამართლებული მირიამი წლინახევრის შვილთან ერთად, რომელიც ამერიკის მოქალაქე გახლდათ, განაჩენის აღსრულებამდე ომდურმანის ქალთა ციხის სიკვდილმისჯილთა საკანში მოათავსეს.

მიუხედავად იმისა, რომ მერიემის დედა ეთიოპიის მართლმადიდებლური ეკლესიის წევრი გახლდათ და ქორწინების მოწმობაშიც მითითებული იყო, რომ ის ქრისტიანია, სასამართლომ მიიჩნია, რომ ვინაიდან ქალის მამა ისლამის მიმდევარი იყო, ისიც მუსლიმანია, და შესაბამისად, რჯულისგან განდგომილია. ბრალდებულს რამდენიმე დღის ვადა მისცეს იმისათვის, რომ ქრისტიანობაზე უარი ეთქვა, მაგრამ მან ეს არ გააკეთა.

დღეს უკვე თავისუფალი მერიემი პატიმრობის დღეებს იხსენებს: „ღამღამობით შემეძლო ბიბლიის კითხვა, რომელსაც ჩემთვის ერთი მუსლიმანი ქალი მალავდა. ერთხელ მე მას ვუთხარი: ‘ეს ბიბლიაა და მე მასში დაწერილის მწამს, ამიტომაც ვიმყოფები ციხეში.’ როგორც ჩანს, ამან მასზე დიდი გავლენა მოახდინა. მისი პატიმრობის ვადის ამოწურვის შემდეგ ის ქრისტიანი გახდა და ქრისტიანული ოჯახი შექმნა…“

მერიემს დღესაც აქვს კონტაქტი ეთიოპიელ, ახლა უკვე ქრისტიან მეგობარ ქალთან, რომელიც მისთვის ბიბლიას მალავდა.

მერიემი დღეს ადამიანის უფლებებისა და რელიგიური თავისუფლების დაცვის კუთხით მოღვაწეობს. მან ასევე საქველმოქმედო ფონდიც დააარსა.

წყარო: http://www.christianheadlines.com/