თეონა მენაბდიშვილი-ის ყველა სტატია

დადე ტელეფონი და ისადილე უფასოდ – ბრიტანეთის ერთ-ერთი რესტორნის ინიციატივა

Frankie & Benny`s ბრიტანული რესტორნების ქსელს სურს ოჯახებს მეტი ურთიერთობა ჰქონდეთ მათ რესტორნებში სადილობისას, ამიტომ მათი შეთავაზებით, თუ მშობლები სადილობისას მობილურებს არ გამოიყენებენ, ბავშვები უფასოდ მიირთმევენ.

რესტორნების ქსელმა 1500 ადამიანის მაგალითზე შეისწავლა, თუ რა გავლენა აქვს ტექნოლოგიებს სადილის კულტურაზე. აღმოჩნდა, რომ მხოლოდ ბავშვები და მოზარდები არ არიან ისინი, ვინც სადილის დროს მობილურებს იყენებენ.

კვლევამ აჩვენა, რომ 6-დან 12 წლამდე ბავშვების 72 პროცენტს სურს, მათი მშობლები არ იყენებდნენ მობილურებს სადილობისას და მეტ დროს უთმობდნენ შვილებთან ურთიერთობას. 70-მა პროცენტმა თქვა, რომ სიამოვნებით ჩამოართმევდნენ მშობლებს მობილურებს, ამისი შანსი რომ ჰქონოდათ, მათ შორის ათიდან ერთმა ბავშვმა თქვა, რომ დაუმალავს ელექტრონული მოწყობილობა მშობლის ყურადღების მისაქცევად.

მშობლების 23 პროცენტი ამბობს, რომ ისინი იყენებენ მობილურებს სადილობისას, მაშინაც კი, როცა შვილი თავისი დღის შესახებ უყვება.

კვლევის ამ შედეგებთან საბრძოლველად და ოჯახებში ურთიერთობების მნიშვნელობის განსამტკიცებლად, Frankie & Benny`s რესტორნების ქსელი, რომელიც ქვეყნის მასშტაბით 250 რესტორანს ფლობს, მიმდინარე წლის დეკემბრიდან აამოქმედებს „არასატელეფონო ზონებს“.

Frankie & Benny`s პირველი რესტორნების ქსელია, რომელიც მობილურების დათმობისთვის უფასო საკვებს გასცემს.

წყარო

თარგმანი: თეონა მენაბდიშვილი

რედაქტირება: მანანა ტვინიკაძე

ცენტრალური აფრიკის რესპუბლიკაში ეკლესიაზე თავდასხმის შედეგად 42 ადამიანი დაიღუპა

სულ ცოტა 42 ადამიანი დაიღუპა ხუთშაბათს, 15 ნოემბერს ცენტრალური აფრიკის რესპუბლიკაში, ალინდაოში. თავდასხმა კათოლიკურ ეკლესიაზე მოხდა. 

ტერორისტული თავდასხმის დროს დაიღუპა ერთი მღვდელიც. არაოფიციალური მონაცემებით, დაღუპულთა რიცხვი 100-ს აღწევს, დაღუპულთა უმრავლესობა დევნილი იყო და ეკლესიას აფარებდა თავს.  

ეკლესიის გვერდით მდებარე სახლები გაძარცვეს და დაწვეს. 

ცენტრალური აფრიკის რესპუბლიკაში ძალადობა 2012 წლის დეკემბრიდან  გახშირდა, მას შემდეგ, რაც აჯანყებულმა მუსლიმანურმა ჯგუფებმა ალიანსი შექმნეს „სელეკას“ სახელით და ძალაუფლება აიღეს ხელში. 

“სელეკას” თავდასხმების საპასუხოდ, ალინდაოს მცხოვრებლების ნაწილმა ჩამოაყალიბა თავდაცვითი ჯგუფები, რომელსაც „ანტიბალაკა“ უწოდეს.  ზოგიერთმა დაჯგუფებამ, რომელიც ქრისტიანებისგან შედგებოდა, თავდასხმები დაიწყო მუსლიმანებზე და ამგვარად, კონფლიქტმა რელიგიური სახე მიიღო. 

ქვეყანაში ბევრი კათოლიკური ეკლესია უზრუნველყოფს თავშესაფარს როგორც ქრისტიანი, ასევე მუსლიმანი დევნილებისთვის.  2017 წლის მაისში, “ანტიბალაკას”  წევრებმა 100-ზე მეტი მუსლიმანი მოკლეს, სანამ გაეროს სამშვიდობო ძალებმა შეძლეს ჩარევა. მას შემდეგ 1600-მდე დევნილი მუსლიმანი ცხოვრობდა ქალაქ სენტ-ლუისის სემინარიაში,  2000-მა მუსლიმანმა კი თავშესაფარი ითხოვა წმინდა პეტრეს ტაძარში, ბანგასოვში.  

ცენტრალურ აფრიკულ რესპუბლიკაში 2015-2016 წლებში ჩატარდა საერთო არჩევნები და ახალი ხელისუფლება მოვიდა სათავეში,  მაგრამ ბოევიკთა ჯგუფები კვლავ აგრძელებენ ადგილობრივ მოსახლეობაზე თავდასხმებს, რასაც ათასობით ადამიანი ემსხვერპლა, სულ მცირე მილიონი ადამიანი კი დევნილი  გახდა. გაეროს მონაცემებით, ცენტრალური აფრიკის რესპუბლიკის მცხოვრებთა ნახევარი ჰუმანიტარულ დახმარებაზეა დამოკიდებული. 

წყარო

თარგმანი: თეონა მენაბდიშვილი

რედაქტორი: მანანა ტვინიკაძე

ბრაზილია საელჩოს გადატანას იერუსალიმში აპირებს

ბრაზილიის საპრეზიდენტო არჩევნების მეორე ტურში ულტრამემარჯვენე კონგრესმენმა ჟაირ ბოლსონარომ გაიმარჯვა. მან უკვე გაამხილა გეგმები ბრაზილიის საელჩოს იერუსალიმში გადატანასთან დაკავშირებით.

„როგორც ჩემი საპრეზიდენტო კამპანიის დროს ვაცხადებდი, მე ვაპირებ საელჩოს თელ-ავივიდან იერუსალიმში გადატანას, ისრაელი სუვერენული სახელმწიფოა და ჩვენ პატივს უნდა ვცემდეთ მას.“ – განაცხადა ჟაირ ბოლსონარომ.

„მე ვაფასებ ჩემი მეგობრის, ჟაირ ბოლსონაროს გადაწყვეტილებას საელჩოს იერუსალიმში გადატანასთან დაკავშირებით, რაც ისტორიული და სწორი ნაბიჯია.” – განაცხადა ისრაელის პრეზიდენტმა რუვენ რივლინმა.

პრეზიდენტი დონალდ ტრამპი, რომელმაც ასევე გადაიტანა ამერიკის საელჩო თელ-ავივიდან იერუსალიმში, ბრაზილიის პრეზიდენტის განცხადებას “ტვიტერზე” გამოეხმაურა და თქვა: „მქონდა სასიამოვნო საუბარი ახალ პრეზიდენტ ჟაირ ბოლსონაროსთან. ჩვენ შევთანხმდით, რომ ამერიკასა და ბრაზილიას ახლო ურთიერთობები ექნება სავაჭრო, სამხედრო და სხვა სფეროებში. 

წყარო

თარგმანი: თეონა მენაბდიშვილი

რედაქტირება: მანანა ტვინიკაძე

 

ამერიკელი მისიონერი საკუთარი ცოლისა და შვილის თვალწინ მოკლეს

ამერიკელი მისიონერი და რვა შვილის მამა, ჩარლზ ვესკო, კამერუნში, საკუთარი ცოლისა და შვილის თვალწინ მოკლეს.

ვესკო და მისი ოჯახი ინდიანიდან ერთი თვის წინ ჩავიდნენ კამერუნში, რათა მისიონერული მსახურება გაეწიათ აფრიკელი ერისთვის, ისინი ორი წლით დარჩენას გეგმავდნენ.

ვესკო ბამენდას გარეუბანში ცხოვრობდა, კამერუნის ჩრდილო-დასავლეთ ინგლისურენოვან რეგიონში, რომელშიც ბოლო ორი წლის განმავლობაში არეულობა და კონფლიქტია.

ვესკო და მისი მეუღლე სტეფანი, ერთ ვაჟთან და სხვა მისიონერთან ერთად, საყიდლებზე მიდიოდნენ, როდესაც მანქანას ცეცხლი გაუხსნეს. ვესკოს ორი ტყვია მოხვდა, ის სასწრაფოდ გადაიყვანეს საავადმყოფოში, ექიმების მცდელობა უშედეგო აღმოჩნდა და 43 წლის ვესკო გარდაიცვალა. მკვლელის ვინაობა დაუდგენელია.

ბოლო 18 თვის განმავლობაში, ძალადობის ფაქტები გახშირდა, 2 000-მდე ადამიანია მოკლული და 170 სოფელი – გადამწვარი კამერუნის ინგლისურენოვან რეგიონებში.

წყარო

 

ჩრდილოეთ კორეის საპატიმროებს გადარჩენილ ქრისტიანთა ისტორიები

ჩრდილოეთ კორეის საპატიმროებს გადარჩენილი ქრისტიანები აღწერენ, როგორ გადაიტანეს მტანჯველი წამება, როგორიცაა ვიწრო და პატარა საკნებში გამომწყვდევა, სადაც შეუძლებელია დაწოლა ან ფეხზე დგომა. ისინი მოწმობენ, რომ ციხის მცველები ქრისტიანს ბავშვის მოკვლასაც კი აიძულებდნენ.

ქრისტიანი ქალი, სახელად ჰიე ვუ (მისი ნამდვილი სახელი არ არის) ორგანიზაცია Open Doors USA-თან საუბრისას ამბობს, რომ მისი ქალიშვილი შიმშილისგან მოკვდა, 1997 წელს, ჩრდილოეთ კორეაში დიდი შიმშილობის დროს. მოგვიანებით მისი მეუღლე ჩინეთში გაიქცა, სადაც ის ქრისტიანი გახდა, მაგრამ დაიჭირეს და ჩრდილოეთ კორეის საპატიმროში გაგზავნეს, სადაც ის დაიღუპა კიდეც.

ქმრის მსგავსად, ჰიე ვუც გაიქცა ჩინეთში, მაგრამ ისიც დაიჭირეს და ჩრდილოეთ კორეაში დააბრუნეს, სადაც ციხეში აღმოჩნდა. ორგანიზაცია Open Doors USA-თან საუბრისას ის ციხეში გატარებულ დღეებს იხსენებს:

„საპატიმრო სხვადასხვა ნაწილად იყო დაყოფილი, ზოგიერთი სექტორი სამეურნეო საქმიანობისთვის იყო, ზოგიერთი – სამშენებლო, ზოგიც კი – მაღაროებში მუშაობისთვის. ქალები და კაცები ცალ-ცალკე იყვნენ, ყველა პატიმარი ისე გამოიყურებოდა, თითქოს სადაცაა სისუსტისგან გული წაუვიდოდათ, ყველა მათგანი უიმედო და სასოწარკვეთილი იყო და ამასთან ერთად მშიერიც.

თითოეული იღებდა ერთ მუჭა სიმინდს და რაღაც წვენს. მთელი წლის განმავლობაში ასე ვიკვებებოდით. პატიმრებს იმდენად შიოდათ, რომ მზად იყვნენ ყველაფრისთვის, ზოგიერთი მათგანი ძროხის განავალს ეძებდა, აგროვებდა და ჭამდა.

პატიმრები არა მხოლოდ მუშაობდნენ, არამედ ექსტრემალურ პირობებშიც უწევდათ ყოფნა, რამაც არაერთის სიკვდილი გამოიწვია.

არსებობდა ცალკე ჯგუფი იმ ადამიანებისთვის, რომლებიც ციხიდან გაქცევას ეცადნენ. ისინი განავლით სავსე კონტეინერებს ეზიდებოდნენ, რომლებიც ხისგან იყო დამზადებული და იმდენად მძიმე იყო, რომ ორ ადამიანსაც უჭირდა ტარება. ისინი ყოველდღე ასრულებდნენ ამ სამუშაოს, მნიშვნელობა არ ჰქონდა, წვიმდა თუ თოვდა, მათ არ ჰქონდათ  შესვენების უფლება.” – იხსენებს ჰიე ვუ.

მან ასევე აღნიშნა, რომ უარავი ადამიანი ციხეში შიმშილისა და მცველებისგან ცუდი მოპყრობის გამო დაიღუპა.

ჰანა, ასევე ყოფილი პატიმარი, ამბობს, რომ ქრისტიანები მოთავსებულნი იყვნენ პატარა საკნებში და იმყოფებოდნენ სხვებისაგან იზოლირებულნი, მათ არ შეეძლოთ დაწოლა ან ფეხზე წამოდგომა.

„ჩვენ დაყოფილები ვიყავით სქესის მიხედვით, მე და ჩემი ქალიშვილი ერთად, ჩემი ქმარი და ვაჟი კი ერთად. ბანაკში მისვლიდან სულ ცოტა ხანში ვნახეთ, როგორ აიძულებდა მცველი ქრისტიანს, მოეკლა ბავშვი.

თითქმის ყოველდღე მივყავდით დაკითხვაზე, ისინი დაუნდობლად გვცემდნენ… როდესაც დაკითხვაზე არ მივყავდით, ჩვენ უნდა ვმდგარიყავით მუხლებზე დაჩოქილნი საღამოს ხუთიდან თორმეტ საათამდე და ხმა არ უნდა ამოგვეღო.“

ჰიე ვუ იხსენებს, რომ მათ არ ჰქონდათ ლოცვის უფლება.

„ცემაზე მეტად რთული ჩემთვის ლოცვის აკრძალვა იყო, ჩვენ არ შეგვეძლო ხმის ამოღება, ამიტომ გულში ვლოცულობდი. ვლოცულობდი, რომ დანგრეულიყო კერპთაყვანისმცემლობა და ადამიანებს მოენანიებინათ, ვლოცულობდი ციხიდან გათავისუფლებაზე და იმაზე, რომ ქრისტიანებს მთელი მსოფლიოდან, ეშუამდგომლათ ჩვენთვის ლოცვებში.“

პატიმრები, რომელთაც შეძლეს და სასწაულის დახმარებით თავი დააღწიეს საპატიმროს, ჰყვებიან იმ საშინელებათა შესახებ, რაც მათ ათწლეულების განმავლობაში გადახდათ თავს.

წყარო

თარგმანი: თეონა მენაბდიშვილი

რედაქტირება: მანანა ტვინიკაძე

 

„Netflix“-ი “ნარნიას ქრონიკების“ მიხედვით ახალ სერიალს გადაიღებს 

„Netflix“-მა განაცხადა, რომ აპირებს ახალი ფილმებისა და სერიალების გადაღებას, კლაივ ლუისის ბესტსელერი წიგნის, „ნარნიას ქრონიკების“ მიხედვით. მათ მრავალწლიან შეთანხმებას მიაღწიეს „The C.S. Lewis Company“-სთან.

ცნობილი ქრისტიანი ავტორისა და ინტელექტუალის, კლაივ ლუისის გერის, დუგლას გრეშემის თქმით, ის მხარს უჭერდა ახალ შეთანხმებას.

„მშვენიერია იმის ცოდნა, რომ უამრავი ადამიანი ელის „ნარნიას“ ნახვას, რომ ტექნოლოგიურმა განვითარებამ და მიღწევებმა შესაძლებლობა მოგვცა, გავაცოცხლოთ ნარნიას თავგადასავლები მთელი მსოფლიოსთვის. როგორც ჩანს, „Netflix“ საუკეთესო საშუალებაა ამ მიზნის მისაღწევად და მოუთმენლად ველი მათთან თანამშრომლობას,” – განაცხადა დუგლას გრეშემმა.

ბევრი ადამიანი მიიჩნევს, რომ კლაივ ლუისის „ნარნიას ქრონიკები“ ერთ-ერთი ყველაზე პოპულარული საბავშვო წიგნია ინგლისურ ლიტერატურაში. მთელ მსოფლიოში ამ წიგნის 100 მილიონ ეგზემპლარზე მეტი გაიყიდა.

პროფესორმა ალისტერ მაკგრეთმა აღნიშნა, რომ მოცემული წიგნის სერია შეიცავს მრავალ რელიგიურ სიმბოლიკას.

2013 წელს დაწერილ სტატიაში პროფესორი აღნიშნავს, რომ წიგნის მრავალი გმირის ხასიათი, ლომი ასლანის ჩათვლით, აღებულია ქრისტიანული თეოლოგიიდან.

ლუისმა 1931 წლის ოქტომბერში, არტურ გრივსისთვის მიწერილ წერილში განმარტა, რომ ასლანის ისტორიით მან გარდასახვის, ჯვარცმისა და აღდგომის ამბავი გადმოსცა.

რედაქტირება: მანანა ტვინიკაძე

წყარო

მაიკ პენსი: „პრეზიდენტი ტრამპი მორწმუნეა, ისევე როგორც მე.”

ვიცე-პრეზიდენტმა მაიკ პენსმა,  პრეზიდენტის ადმინისტრაციაში რწმენის როლის შესახებ ისაუბრა და განაცხადა: „ პრეზიდენტი ტრამპი მორწმუნეა ისევე, როგორც მე.”

CBN-სთვის მიცემულ ინტერვიუში პენსმა აღნიშნა, რომ ის და დონალდ ტრამპი მადლობელნი არიან იმ მხარდაჭერისთვის, რომელსაც ევანგელური ქრისტიანებისგან იღებენ.

„ვფიქრობ, პრეზიდენტი ტრამპის გული მადლიერებითაა სავსე, ჩვენი ქვეყნის ევანგელური ქრისტიანების გამო. უნდა გითხრათ რომ ყველაზე სასიამოვნო სიტყვები, რაც მე და პრეზიდენტს მოგვისმენია,  არის ამ ადამიანების მიერ ხელის ჩამორთმევისას ნათქვამი ფრაზა: „ჩვენ თქვენთვის ვლოცულობთ“ – განაცხადა ვიცე-პრეზიდენტმა.

პენსმა ასევე დაადასტურა, რომ ისიც და პრეზიდენტი ტრამპიც, ერთგული მიმდევრები არიან ქრისტიანული რწმენისა და მათ ადმინისტრაციაში ლოცვას დიდი ადგილი უკავია.

„ მე პრეზიდენტთან და რელიგიურ ლიდერებთან ერთდ ვიყავი ოვალურ კაბინეტში, როდესაც მათ ითხოვეს, შეჩერებულიყვნენ და ლოცვისთვის გამოეყოთ დრო, რაზეც პრეზიდენტი მაშინვე სიამოვნებით დათანხმდა. მეც და დონალდ ტრამპიც მორწმუნეები ვართ და ორივეს კარგად გვესმის, რამდენად დიდია რწმენის როლი ჩვენი ერის  ცხოვრებაში. ვფიქრობ, ამერიკელი ხალხისთვის გამამხნევებელი უნდა იყოს იმის ცოდნა, რომ ჰყავთ პრეზიდენტი, რომელიც ეთანხმება, პატივს სცემს და აფასებს რწმენისა და რელიგიის მნიშვნელობას ჩვენს ოჯახებში საზოგადოებასა და სახელმწფოში. ”

წყარო

კათოლიკე მღვდელი, ტომ უზუნალილი, თვრამეტთვიანი ტყვეობის შემდეგ გაათავისუფლეს

ტომ უზუნალილის ბედთან დაკავშირებით თვრამეტთვიანი გაურკვევლობა დასრულდა. იემენში ისლამური სახელმწიფოს (isis) მიერ გატაცებული  მღვდელი საბოლოოდ თავისუფალია და ინდოეთში ბრუნდება.

მისი გათავისუფლების შესახებ ოფიციალურად განაცხადა ინდოეთის საგარეო საქმეთა მინისტრმა.

ტომ უზუნალილი მსოფლიოს ყურადღების ცენტრში პირველად 2016 წლის 4 მარტს მოექცა, როდესაც ტერორისტები თავს დაესხნენ მისიონერულ სახლს იემენში. თავდასხმისას 16 ადამიანი გარდაიცვალა, დაჭრილი ტომი კი გაიტაცეს.

ვრცელდებოდა ჭორი, რომ იგი წითელ პარასკევს ჯვარს აცვეს, რასაც უარყოფდა ოფიციალური ვატიკანი და ხალხს გატაცებულისთვის ლოცვისკენ მოუწოდებდა.

ტომ უზუნალილი უკვე შეხვდა პაპ ფრანცისკეს, რომელიც მისი გათავისუფლების მიზნით აქტიურად იყო ჩართული მოლაპარაკებებში.

წყარო

საიდან გაჩნდა 23 სექტემბერს სამყაროს აღსასრულის ვერსია და აქვს თუ არა მას საფუძველი

ნუმეროლოგების თქმით, 23 სექტემბერს პლანეტის აღსასრული დადგება და მას ეგრეთ წოდებული პლანეტა x დაეჯახება.

ნუმეროლოგი დევიდ მიდი ამბობს, რომ ლუკას სახარების 21-ე თავის 25-ე და 26-ე მუხლების წინასწარმეტყველება აღწერს ცოტა ხნის წინ მომხდარ მზის დაბნელებას, ქარიშხლებს, მიწისძვრასა და სხვა ბუნებრივ მოვლენებს, რაც აპოკალიფსის წინა პერიოდს წარმოადგენს.

ლუკას სახარება. თავი 21

  1. იქნება ნიშნები მზეზე, მთვარესა და ვარსკვლავებზე, დედამიწაზე კი ერები შეშფოთდებიან თავგზააბნეულნი ზღვისა და ტალღების ღრიალის გამო.
  2. ხალხს გული შეუწუხდება შიშით და დედამიწაზე მომავალთა მოლოდინით, რადგან შეირყევიან ციური ძალები.
  3. მაშინ იხილავენ ძე კაცისას, ღრუბლებზე მომავალს, დიადი ძალითა და დიდებით.

სოციალურ ქსელებში გავრცელებულ ამ ვერსიას არ ეთანხმება ევანგელური, ანგლიკანური, კათოლიკური და მართლმადიდებლური ეკლესიების უდიდესი ნაწილი.

დევიდი მიიჩნევს, რომ პლანეტა X გამოიწვევს ვულკანურ ამოფრქვევებს, მიწისძვრებსა და ქარიშხლებს, რაც უფრო მეტად გამძაფრდება მიმდინარე კვირაში, რადგან ზემოხსენებული პლანეტა ძალიან ახლოს ჩაუვლის დედამიწას. მისი თქმით, დასკვნებს მზეზე დაკვირვების შედეგად აკეთებს.

ნასა კი ფიქრობს, რომ ეს ყველაფერი უბრალოდ ცუდი ხუმრობაა.

ცნობილი კრეაციონისტი, ჯონათან სარფათი, საკითხის მიმართ სკეპტიკურადაა განწყობილი და ამბობს: „როგორც ყოველთვის, ნებისმიერი სახის ასტროლოგია (თუნდაც ქრისტიანობაში ადაპტირებული) გულმოდგინედ არჩევს ვარსკვლავების იმ განლაგებას, რომელიც შეესაბამება სასურველ დასკვნას. არ არსებობს იმის მტკიცების საფუძველი, რომ 23 სექტემბერი ბიბლიური წინასწარმეტყველების აღსრულების თარიღია. ქრისტიანები ფრთხილად უნდა იყვნენ, რათა მათზე გავლენა არ იქონიოს ამ უსაფუძვლო, სენსაციურმა განაცხადებამ.”

წყარო

 თარგმანი: თეონა მენაბდიშვილი

რედაქტირება: მანანა ტვინიკაძე

„Googling God“ – სადიკუსიო შეხვედრების სამდღიანი ციკლი სტუდენტებისთვის

საქართველოს ქრისტიან სტუდენტთა კავშირისა და თბილისის საერთაშორისო ქრისტიანული საზოგადოების ორგანიზებით 2, 3 და 4 მაისს, სულხან-საბა ორბელიანის სახელობის უნივერსიტეტში, ჩატარდება შეხვედრების სერია, სახელწოდებით – „Googling God”.

„Googling God“ არის სადიკუსიო შეხვედრების სამდღიანი ციკლი სტუდენტებისთვის, რომელზეც მოწვეული სტუმარი – საერთაშორისო მომხსენებელი, ავტორი და აპოლოგეტი მაიკლ ოთსი, შეეცდება სტუდენტებთან ერთად უპასუხოს კითხვებს:

• რა არის ცხოვრების აზრი?
• როგორ შეიძლება იესო ქრისტე იყოს ერთადერთი გზა ღმერთამდე?
• სად არის ღმერთი, როდესაც გარშემო ამდენი ტანჯვა და უსამართლობაა?

მაიკლ ოთსი უკვე თოთხმეტი წელია მოღვაწეობს დიდ ბრიტანეთში, მოგზაურობს მრავალ ქვეყანაში და სიტყვით გამოდის სხვადასხვა უნივერსიტეტებში გამართულ ღონისძიებებზე.
მისი გამოსვლებისა და წიგნების თემა ცხოვრების მთავარ ფილოსოფიურ საკითხებს ეხება და ქრისტიანულ რწმენაში არსებულ „წინააღმდეგობებს“ პასუხობს. ოთსი უკვე მეორედ ეწვევა საქართველოს და ამჯერად „Googling God”-ის ფარგლებში სტუდენტებთან შეხვედრებს გამართავს.

ღონისძიების შესახებ დამატებითი იფორმაციისთვის დარეკეთ – 571 07 35 95