ჯონ ფაიფერი: „რას ამბობს ბიბლია თანამედროვე თამაშებზე დამოკიდებულების შესახებ?“

0 274

თეოლოგი ჯონ ფაიფერი ამტკიცებს, რომ უფალ იესოს მცნება: „თუ გაცდუნებს შენი თვალი, ამოითხარე და გადააგდე“, შეიძლება გამოვიყენოთ იმ ადამიანებთან მიმართებით, რომლებიც ცდილობენ გათავისუფლდნენ სხვადასხვა თამაშებსა და გართობაზე დამოკიდებულებისგან.

ცოტა ხნის წინ ფაიფერი, თავისი პოდკასტის მეშვეობით, გამოეხმაურა მსმენელს, რომელმაც თქვა, რომ ვერ ამარცხებდა თავის დამოკიდებულებას ვიდეოთამაშების მიმართ.

„დარწმუნებული ვარ, რომ ხანმოკლე ემოციები ვერც კი შეედრება იმ სიხარულს, რაც შეიძლება ღმერთთან ახლო ურთიერთობაში იპოვოს ადამიანმა“, ამბობს მსმენელი. „შემიძლია სამი საათის განმავლობაში ვთამაშობდე ვიდეოთამაშს და მაინც სიცარიელეს და დაუკმაყოფილებლობას ვგრძნობდე, მაგრამ მომდევნო დღეს გართობის სურვილი ისევ მიახლდება და ეს საშინელ, ჩაკეტილ წრედ იქცევა. მინდა სულიერად გავიზარდო. არ მინდა წვრილმანებზე გავფლანგო ჩემი ცხოვრება.“

ხუცესმა ჯონ ფაიფერმა საუბარი დაიწყო იმით, რომ ამ ადამიანს შეუძლია შეწყვიტოს ვიდეოთამაშების თამაში. „ამ თამაშზე მიჯაჭვული არ ხართ“, განმარტა მან, „შეგიძლიათ გაჩერდეთ. შეგიძლიათ თავი დაანებოთ მას. რა თქმა უნდა, მილიონი დოლარი რომ შემოეთავაზებინათ, ან სერიოზული საფრთხე რომ გეგრძნოთ, ადვილად შეძლებდით ამაზე უარის თქმას.“

შემდეგ ფაიფერი ამბობს, რომ მსმენელი დარწმუნებული არ არის იმასთან დაკავშირებით, რომ სხვადასხვა გასართობი ვერც კი შეედრება ღმერთთან ურთიერთობას. „არა, თქვენ სინამდვილეში არ ხართ დარწმუნებული. თქვენ ამბობთ, რომ ეს ასეა, მაგრამ ეს მხოლოდ სიტყვებია“, თქვა მან და ბოლოს უფალ იესოს სიტყვები დაამატა: „მათი ნაყოფებით იცნობთ მათ.“

„მთავარი, რასაც უფალი იესო გულისხმობდა, ისაა, რომ ადამიანები ბევრს ლაპარაკობენ, ბევრს ფიქრობენ, ბევრს გრძნობენ, მაგრამ მხოლოდ ნაყოფს აქვს გადამწყვეტი მნიშვნელობა.“

ფაიფერის თქმით: „ვიდეოთამაშები თქვენი ნებისყოფის მბრძანებელი ხდება. ეს იმას ნიშნავს, რომ თქვენ მათ ფერხთით ჯდებით და მონასავით ასრულებთ მათ ბრძანებას.“

ხუცესმა უფალ იესოს სიტყვები მოიშველია ამასთან დაკავშირებით: „თუ გაცდუნებს შენი მარჯვენა თვალი, ამოითხარე და გადააგდე, ვინაიდან უმჯობესია შენთვის, რომ ერთი ასოთაგანი დაგეღუპოს, ვიდრე მთელი შენი სხეული გეენაში ჩავარდეს. თუ შენი მარჯვენა ხელი გაცდუნებს, მოიკვეთე იგი და გადააგდე, ვინაიდან უმჯობესია შენთვის, რომ ერთი ასოთაგანი დაგეღუპოს, ვიდრე მთელი შენი სხეული გეენაში ჩავარდეს“ (მათე 5:28-29).

„აი, ჩემი რჩევა“, დასძინა მან ბოლოს. „ამოითხარეთ თვალი და მოიკვეთეთ ხელი, ანუ მოიშორეთ ყველა აპლიკაცია, რომელიც გითრევთ და მონად გაქცევთ. უბრალოდ, წაშალეთ ისინი თქვენი ტელეფონიდან.“

2018 წელს ჯგუფ Nielsen-ის კვლევის თანახმად, ზრდასრულები დღეში 11 სთზე მეტს ხარჯავენ მედია-საშუალებების ყურებაზე, კითხვაზე ან მოსმენაზე. ოთხი წლის წინ ეს დრო 9 საათსა და 32 წუთს შეადგენდა.

წყარო

ჩატვირთვა...